Eitraður kræklingur í Hvalfirði

Það hefur verið viðmiðunarregla að óhætt sé að tína og neyta kræklings í þeim mánuðum sem hafa bókstafinn r í nafni sínu, sem sagt frá september og fram í apríl. Nú hefur Matvælastofnun hinsvegar sent út viðvörun þess efnis að ekki sé óhætt að neyta kræklings úr Hvalfirðinum.

„Þetta er svokallað DSP-eitur samkvæmt niðurstöðum sem við fengum úr sýni sem tekið var í byrjun mánaðar og þetta reynist vera umtalsvert yfir mörkum," segir Þór Gunnarsson, sérfræðingur hjá Matvælastofnun.

„Venjulega byggjum við bæði á eiturmælingum úr skel og svo erum við með greiningar á magni eiturþörunga í sjó. Við erum því með ansi góða yfirsýn yfir ástandið og það er ekki gott."

Sökudólgurinn er agnarsmár svifþörungur sem kræklingurinn nærist á. Eiturþörungarnir eru hættulausir kræklingnum sjálfum en geta haft hvimleiðar afleiðingar fyrir þá sem neyta hans.

„DSP-eitrun herjar fyrst og fremst á meltingarveg með niðurgangi, uppköstum og kviðverkjum. Fólk er svo mis næmt fyrir þessu eitri, í sumum tilfellum getur fólk orðið fárveikt á meðan aðrir finna minna fyrir þessu. En aðvörunin er engu að síður góð og gild."