Gefa öllum 1. bekkingum hjálma

Eimskipafélag Íslands og Kiwanishreyfingin gefa öllum grunnskólabörnum sem ljúka 1. bekk í vor reiðhjálma. Þetta er árviss viðburður félaganna til að stuðla að umferðaröryggi yngstu hjólreiðarmanna landsins.

Verkefnið kallast Óskabörn þjóðarinnar, en samkvæmt tilkynningu fá um 4.500 börn hjálma í ár. 45 þúsund börn, eða 14 prósent þjóðarinnar hafa fengið hjálma á þeim tíu árum sem verkefnið hefur staðið yfir.

 „Verkefnið er okkur afar kært og stendur okkur nærri. Eimskip leggur ríka áherslu á öryggismál í allri sinni starfsemi og vill með þessum hætti leitast við að miðla þeirri reynslu til barnanna sem þurfa að vera meðvituð um mikilvægi öryggis í umferðinni,“ segir Gylfi Sigfússon, forstjóri Eimskips.

„Ljóst er samkvæmt upplýsingum frá lögreglunni víðsvegar um land að hjálmarnir hafa bjargað mörgum börnum frá alvarlegum meiðslum.“

Eimskip hlaut á síðasta ári mestu viðurkenningu sem alþjóða Kiwanishreyfingin veitir fyrir framlag sitt til samfélagslegra málefna.

Kiwanishreyfingin mun afhenda börnunum hjálmana á næstu vikum og eru foreldrar og forráðamenn beðnir um að vera vakandi fyrir því þegar börn þeirra koma heim með hjálma og aðstoða þau við að stilla þá rétt.