Bjarni er á leiðinni heim

Bjarni Fritzson, spilandi þjálfari Akureyrarliðsins undanfarin ár og næstmarkahæsti leikmaður Olís-deildar karla, spilaði í gær sinn síðasta leik með Akureyri þegar liðið vann HK og tryggði sér áframhaldandi sæti í efstu deild.

Bjarni staðfesti það í viðtali við RÚV eftir leikinn að hann færi á leið suður eftir þetta tímabil.

„Það er búið að skrifa svolítið um þetta og menn eru búnir að staðfesta hitt og þetta. Það hefur enginn talað við mig en RÚV er alveg með þetta," sagði Bjarni í viðtalinu á RÚV og bætti svo við:

„Ég er að flytja suður með fjölskylduna mína. Ég er búin að vera hérna í fjögur ár og er búinn að eiga fjögur frábær ár hérna. Það er búið að vera æðislegt að búa á Akureyri en það er kominn tími á að fara heim og ég er að fara að gera það," sagði Bjarni.

Bjarni skoraði 11 mörk í lokaleiknum í gærkvöldi og var því með 131 mark í 20 leikjum í Olís-deildinni í vetur eða 6,6 mörk að meðaltali í leik.