Allt gert til að verja störf á Húsavík

Bæjarstjóri Norðurþings á Húsavík segir að allt verði gert til að verja þau hátt í sjötíu störf sem eru í hættu vegna brotthvarfs útgerðarfélagsins Vísis úr bænum. Viðræður hefjist strax eftir páska um möguleg kaup á fasteignum og hluta af veiðiheimildum Vísis.

Það var mikið áfall fyrir atvinnulífið á Þingeyri, Djúpavogi og á Húsavík þegar útgerðarfélagið Vísir tilkynnti að það ætlaði að hætta allri starfsemi á þessum stöðum og flytja hana til Grindavíkur. Bæjarráð Norðurþings á Húsavík ályktaði um málið í gær og segir Bergur Elías Ágústsson bæjarstjóri að allt verði gert til að verja þau 66 störf sem eru hjá Vísi í bænum í dag.

„Við viljum ræða við félagið. Það er þannig að það var skrifað undir samkomulag á sínum tíma og við viljum byggja á því samkomulagi. Okkar markmið er náttúrlega að tryggja að veiðiheimildir og störfin, þ.e.a.s. 6 % af störfum á Húsavík, hverfi ekki,“ segir Bergur Elías.

Ef samningar nást við Vísi er ljóst að um töluvert mikla fjárfestingu yrði að ræða fyrir Norðurþing bæði í fasteignum og veiðiheimildum.

„Það er ljóst að við munum ekki gera þetta einir. En við erum að vinna fyrir fólkið og við verðum að vinna að hagsmunum þess. Það er ljóst að fyrir Þingeyri, Húsavík og Djúpavog er þetta stórmál og þá verða menn að gera eitthvað,“ segir Bergur Elías.

Bæjarfélagið muni reyna að fá sem flesta í lið með sér því ljóst sé að bæjarfélagið ráði ekki við þetta eitt og sér. Bærinn hafi átt tvo ágæta fundi með vísismönnum og menn ætli að gefa sér tíma fram yfir páska til að skoða málin og funda strax eftir páskahátíðina.

„Það vona ég svo sannarlega. Það er ljóst að það verður ekki við þessi áföll unað,“ segir Bergur Elías.

Hann segir brotthvarf Vísis mikið áfall fyrir allt starfsfólkið, hvort sem það séu Íslendingar eða útlendingar.

„Það fólk sem er á Húsavík er fyrirmyndarfólk sama hvaðan það kemur. Það eru bæði Íslendingar og útlendingar. Þetta fólk hefur keypt bæði fjárfest og keypt eignir og hafa verið góðir íbúar í samfélaginu. Þannig að það skiptir ekki meginmáli,“ segir Bergur Elías Ágústsson.