Þátttakendur óskuðu eftir rýmri tíma

Frestur til að skila inn tillögum um heildarskipulag fyrir Háskólavæðið hefur verið framlengdur um rúmar tvær vikur, eða til 12. maí. Áætlað er að niðurstaða dómnefndar liggi fyrir í byrjun júní.

„Það er búið að vera svo mikið af samkeppnum í gangi, sérstaklega varðandi Úlfarsárdal sem var að klárast. Það komu óskir frá þátttakendum um að fá rýmri tíma og okkur fannst það mjög eðlilegt,“ segir Páll Hjaltason, formaður umhverfis- og skipulagssviðs Reykjavíkur, aðspurður.

„Það sem er mikilvægast er að fá góðar tillögur og einhverjar vikur til eða frá skipta litlu í því samhengi.“

Reykjavíkurborg og Háskóli Íslands í samstarfi við Arkitektafélag Íslands efndu í febrúar til hugmyndasamkeppni um skipulagið. 

Þátttakendur geta skilað inn heildarhugmyndum að framtíðarskipulagi eða lagt hugmyndir inn í umræðuna. Almenningur getur því sent inn tilllögur að skipulagi eða fyrirkomulagi að hluta svæðisins. Vonir standa til að þær verðlaunahugmyndirnar nýtist í áframhaldandi vinnu við gerð rammaskipulags fyrir svæðið.

„Það væri mjög gaman ef sem flestir taka þátt. Þetta er rosalega mikilvægt svæði í Reykjavík sem aldrei hefur verið skoðað sem slíkt nema í aðalskipulagi. Það eru mikil tækifæri til að efla þetta svæði,“ segir Páll. 

Heildarfjárhæð verðlauna verður allt að 6,5 milljónum króna án vsk. Á síðunni Hugmyndasamkeppni.is má sjá nánari upplýsingar, þ.á.m. nákvæma keppnislýsingu.