„Algjörlega afleit staða“

Magnús Geir Þórðarson, nýráðinn útvarpsstjóri RÚV, telur nauðsynlegt að Ríkisútvarpið flytji sig um set vegna kostnaðar á húsnæðinu. Húsið sé dýrt og lánin há á húsinu og segir hann það stóra ástæðu þess að fjármál Ríkisútvarpsins séu eins og þau eru í dag, en gert er ráð fyrir 357 milljón króna tapi á yfirstandandi rekstarári.

„Húsnæðið hentar ekki fyllilega út frá því hvernig það er nýtt og hvernig starfsemin er í dag, en út frá fjármálum fyrirtækisins er þetta algjörlega afleit staða,“ sagði Magnús í viðtali í Kastljósi.

Hann segir starfsemi RÚV allt aðra en áður var og húsið því allt of stórt miðað við starfsemina sem nú er.

Magnús líkir húsnæðinu við spennitreyju og ekki sé hægt að framleiða íslenskt gæðaefni vegna þessa.

„Ég vonast til að ef okkur tekst að vinda ofan af þessu, finna farsæla lausn á húsnæðismálunum, þá komumst við út úr þessari spennitreyju.“

Þá vonast hann til að með þessari uppstokkun og þessum breytingum þá muni takast að nýta fjármuni betur og meira fari í innhald og minna í umbúðir.

Öllum framkvæmdastjórum Rúv var sagt upp í dag. Aðspurður hvenær stöður þeirra yrðu auglýstar sagði Magnús Geir vonast til þess að það yrði um helgina.