Forstjóri Össurar í áfalli

Ákvörðun ríkisstjórnarinnar að draga tilbaka umsókn Íslands um aðild að Evrópusambandinu er afdrifaríka fyrir fyrirtæki og almenning í landinu. Þetta segir formaður Samtaka iðnaðarins og óttast að Íslandi missi aðgang að innri markaði Evrópska efnhagssvæðisins. Forstjóri Össurar segist vera í áfalli yfir ákvörðun ríkisstjórnarinnar.

„Þetta er afdrifarík ákvörðun fyrir fólk og fyrirtæki,“ segir Svava Helen Björnsdóttir, formaður Samtaka iðnaðarins. „Með þessari ákvörðun þá fer ríkisstjórnin gegn mörgum fyrirtækjum innan Samtaka iðnaðarins sem vilja að kannað sé til hlítar hvort að samkeppnishæfni þeirra sé betur borgið innan eða utan ESB.“

Óánægja er víða í atvinnulífinu með ákvörðun ríkisstjórnarinnar. Svana Helen óttast það sem muni fylgja í kjölfarið. „Það sem menn óttast að sé í uppsiglingu er að við missum aðgang að innri markaði EES. Við erum ekki að uppfylla EES-samninginn ég hef miklar áhyggjur af því að honum verði rift þegar viðræðum við ESB verður slitið.“

Slæmar fréttir fyrir fyrirtæki í alþjóðaviðskiptum

Nokkur fyrirtæki gáfu starfsmönnum sínum frí í dag til að halda á Austurvöll og mótmæla. Jón Sigurðsson, forstjóri stoðtækjafyrirtækisins Össurar, er afar ósáttur með ákvörðun ríkisstjórnarinnar.

„Ég held að langflestir séu mjög svekktir og ég er ákaflega sjokkeraður,“ segir Jón Sigurðsson. „Þetta er mjög slæmar fréttir fyrir okkur og reyndar alla þá sem eru í alþjóðaviðskiptum og reka fyrirtæki á Íslandi.“

Er þetta áfall fyrir fyrirtækið Össur?

„Já, ég held að ég megi segja það. Við erum skilin eftir með mjög stórt spurningamerki,“ svarar Jón Sigurðsson, forstjóri Össurar.

Jón og Svana eru bæði sammála um að réttast hefði verið að klára aðildarviðræðurnar. „Ég tel að þessi umræða hafi ekki farið nógu vel fram,“ segir Svana Helen. „Með því að loka leiðum núna eru rekstrarskilyrði margra fyrirtækja sett í uppnám.“