9500 reglugerðir orðið hluti af EES-samningnum á tuttugu árum

Um 9500 reglugerðir, tilskipanir og ákvarðanir frá Evrópusambandinu hafa orðið hluti af EES-samningnum eftir að hann gekk í gildi fyrir rúmum tuttugu árum síðan. Af þeim eru 5000 í gildi núna. Þetta kom fram í máli Ingimars Karls Helgasonar, ritstjóra Reykjavíkur vikublaðs, í þættinum Bítið á Bylgjunni í morgun.

Það gera að meðaltali um 430 reglugerðir á hverju ári. Til samanburðar afgreiðir Alþingi um 120 lög á hverju ári. Samtals hafa verið afgreidd um 2600 lagafrumvörp frá Alþingi frá árinu 1992.

Fram kom að um 90 prósent reglugerðanna komi frá framkvæmdarstjórn Evrópusambandsins og um tíu prósent komi frá Evrópuþinginu eða leiðtogaráðinu.

Þær gerðir sem teknar eru inn hér á landi eru þær sem varðar frjáls vöruskipti og þjónustuskipti, fjármagnshreyfingar og frjálsar ferðir launafólks milli aðildarríkja EES. Það eru til dæmis ákvæði um samkeppni, félagsmál og umhverfismál. Í máli Ingimars kom fram að einnig séu ákvæði sem varða okkur ekki beint í hinu daglega lífi.

„Síðan eru ákvæði sem skipta okkur máli, eins og ákvæði um lágmarks hvíldartíma launafólks,“ sagði Ingimar Karl.