Jennifer Lawrence ætlar í langt frí

Jennifer Lawrence ætlar að taka sér pásu frá kvikmyndaleik í eitt ár.  Þessu heldur framleiðandinn Harvey Weinstein fram. Harvey Weinstein framleiddi meðal annars myndina The Silver Linings Playbook, en fyrir leik sinn í henni fékk Jennifer Óskarsverðlaun.

Harvey segir að Jennifer ætli ekki að gera neitt í heilt ár, enda hafi hún unnið eins og berserkur undanfarin ár hvíldarlaust. Hann segir að Jennifer sé afar greiðvikin, og hafi tekið að sér hlutverk, eins og í American Hustle, þegar hún hefði getað tekið sér frí. „Hún tók að sér hlutverkið í Hunger Games þegar hún var ung að árum, og vissi ekki hvað það hefði í för með sér,“ sagði Harvey. „En hún er algjör fagmaður, og verður það ævinlega.“

Jennifer lýsti því yfir í viðtali fyrir nokkru að þegar tökum á Hunger Games-þríleiknum lyki ætlaði hún að slökkva á farsímanum í eitt ár. Það hefur greinilega ekki verið sagt í neinum hálfkæringi, og það er útlit fyrir að aðdáendur hennar verði að þola heilt ár án þess að Jennifer Lawrence leiki í kvikmynd.