Hvað er hægt að gera í Reykjavík um páskana?

Allskonar afþreying og þjónusta verður í boði á höfuðborgarsvæðinu um páskana.

Skautahöll Reykjavíkur verður opin milli eitt og sex alla daga páskahátíðarinnar fyrir þá sem vilja taka nokkra hringi á skautunum.

Skíðasvæðin í Bláfjöllum og Skálafelli verða opin um helgina ef veður leyfir. Að vísu þurfti að loka snemma í dag vegna hvassviðris.

Opið verður í Kringlunni í dag og laugardaginn fyrir páska. Opið verður í Smáralind alla daga nema Páskadag og Föstudaginn langa en Smárabíó verður opið alla hátíðina.

Á föstudag og sunnudag verður hægt að fara í sund í Árbæjarlaug, Laugardalslaug og Vesturbæjarlaug milli tíu og sex. Allar laugar í Reykjavík eru opnar í dag og annan í páskum.

Þá er opið í World Class í Laugum alla hátíðardaga, milli tíu og sex á föstudag og sunnudag en átta til tíu aðra daga.

Á föstudaginn langa mun Vantrú svo standa fyrir sínu árlega páskabingói á Austurvelli klukkan eitt. Boðið verður upp á veitingar og verður glaðningur í boði fyrir börnin. 

Svo verður opið í Fjölskyldu- og húsdýragarðinum alla páskana frá tíu til fimm með þéttri dagskrá allan daginn.

Að lokum hefur fréttastofa tekið saman helstu upplýsingar um opnunartíma og tilboð skemmtistaða um páskana.