Slapp við slátrun sóknarprestsins

Björg Ingadóttir, forstjóri/eigandi tískufataverslunarinnar Spaksmannsspjara, hefur beðist afsökunar á ummælum sínum um að feitar konur tímdu ekki að kaupa sér föt. Ummælin lét hún falla í viðtali við tímaritið MAN og hafa þau valdið miklu fjaðrafoki á netinu í dag.

„Það eru allir sífellt að bíða eftir að verða grannir. Við prófuðum að gera stórar stærðir í Spakmannsspjörum en það seldist ekki mikið af þeim enda er ég á því að konur tími ekkert að kaupa sér dýr föt á meðan þeim finnst þær vera of feitar, þær tíma bara að éta. Það er rándýrt að éta svona mikið og það kostar að fá sér einkaþjálfara,“ sagði Björg í viðtalinu.

Hún segir í stöðuuppfærslu á Facebook-síðu sinni að um hallærislegan húmor hafi verið að ræða. „Þetta með að feitar konur tíma bara að... var hallærislegur og lélegur húmur. Ég biðst innilegrar afsökunnar á þessum ummælum. Markmið mitt var ekki að særa neinn heldur ræða það sem ég nefni hérn að ofan, að konum þyki þær oft ekki eiga skilið dress í stærri stærðum. Konur í öllum stærðum geta verið smart og þá séstaklega ef þær eru bara ánægðar með sig og sinn líkama,“ segir í stöðuuppfærslunni.

Jóna Hrönn Bolladóttir, sóknarprestur Vídalínskirkju, setti athugasemd við uppfærslu Bjargar þar sem hún segist hafa ætlað að „slátra henni“ á Facebook-síðu sinni og sé fegin því að hún biðjist afsökunar.

„Ég er fegin að þú setur þetta hér inn, því ég ætlaði að fara slátra þér á fésbókarsíðu minni. En er hætt við,“ segir Jóna Hrönn. „Ég á þykkar vinkonur sem eru gordjöss til fara og fallegustu konur sem ég þekki. Það er þannig að holli maturinn er afar dýr og sérstaklega eftir því sem hann er hreinni. Þess vegna er það algengt að þeir sem eru fátækir eru of feitir. Þannig að sú staðhæfing þín var bull. Sælgæti, gos og kex er hið ódýra. En gangi þér vel með allt þitt.“

Post by Björg Ingadóttir.