Flugumferð spillir friðnum á Þingvöllum

„Friðsæld er meðal grunngilda þjóðgarðsins og stöðugt vaxandi flugumferð hefur spillt þeim verðmætum,“ segir Þingvallanefnd sem kveður þyrluflug og annað útsýnisflug innan þjóðgarðsins hafa aukist jafnt og þétt síðastliðin ár.

Þingvallanefnd hefur vegna þessa ákveðið að kynna sér reglur um flugumferð yfir þjóðgörðum og náttúruverndarsvæðum og ræðir hvort tilefni sé til að útbúa skýrari reglur.

„Hingað til hefur Þingvallanefnd í sérstökum tilfellum leyft lágflug og lendingar vegna rannsókna og flutninga og eru þá valdir tímar þannig að sem minnstu raski valdi,“ segir í bókun nefndarinnar.