Íhuga réttarstöðu sína eftir niðurfellingu máls

Tveir karlmenn sem handteknir voru um miðjan desember, grunaðir um kynferðislegt brot á ungri konu á Ísafirði, ætla að kanna réttarstöðu sína eftir að málið var fellt niður.

Kristján Óskar Ásvaldsson, lögmaður annars mannsins, segir það í skoðun hvort skjólstæðingur sinn muni leita réttar síns. „Ég á eftir að fá rannsóknargögnin og þegar ég fæ þau verður það kannað.“

„Í lögum um meðferð sakamála er kveðið á um bótaábyrgð ríkisins ef menn hafa verið settir í gæsluvarðhald eða sætt handtöku að uppfylltum ákveðnum skilyrðum. Ég mun kanna það á næstu dögum,“ segir Kristján.

Lögmaður hins mannsins segir hann skoða sína réttarstöðu. „Ekki hefur verið tekin nein ákvörðun um að fara í mál eða slíkt,“ segir Grímur Sigurðarson.

Fimm erlendir karlmenn voru upphaflega handteknir vegna málsins að morgni 14. desember. Lögreglan hafði þá fengið tilkynningu klukkan 4:20 um nóttina að kynferðisbrot hefði átt sér stað í húsi á Ísafirði. Brotaþoli, ung kona, var flutt til skoðunar á heilbrigðisstofnun Vestfjarða á Ísafirði.

Öllum mönnunum fimm var síðar sleppt. Tveir fengu réttarstöðu grunaðra og voru úrskurðaðir í farbann til 17. febrúar. Margir voru yfirheyrði í tengslum við rannsóknina og gekk hún vel að sögn lögreglu.