Hverfandi líkur á að féð verði endurheimt

Fórnarlömb meints svikahrapps, sem er sakaður um að hafa á tímabilinu 2006- 2010 haft á annað hundrað milljónir af að minnsta kosti sextán manns, segja hann hafa komið fyrir sjónir sem ábyrgur og trúverðugur viðskiptamaður. Hverfandi líkur eru á að nokkur hluti fjárhæðarinnar verði endurheimtar.

Ákæran gegn Sigurði Kárasyni telur sextán blaðsíður, en honum er gefið að sök að hafa haft milljónir af fjölda fólks úr öllum stigum samfélagsins, þar á meðal presti, flóttamanni og vörubílstjóra.

Í mörgum tilfellum var um að ræða félítið fólk sem tók lán eða yfirdrátt til að geta látið Sigurð fá peninga, sem hann sagðist meðal annars ætla að nýta til gjaldeyrisviðskipta og til kaupa á krónubréfum. Fólkið átti svo að njóta ávöxtunar sem yrði til vegna viðskiptanna við Sigurð.

Svikamillan krafðist sífellt nýrra fórnarlamba þar sem hann fékk nýtt fólk til að millifæra inn á þá sem harðast sóttust um endurgreiðslu. Lögreglan hefur gögn undir höndum sem sýna hvernig peningar streymdu þannig á milli fórnarlambanna, frá nýjum til eldri.

Þannig blekkti Sigurður fólk til að láta sig hafa peninga sem hann notaði bæði til að greiða eldri skuldir og eins til eigin framfærslu, en á skattframtölum Sigurðar og eiginkonu hans sést að hann var eignalaus og gjaldþrota þegar hann á að hafa framið brot sín. Eitt fórnarlambanna sagði Sigurð hafa lifað hátt, hann bjó í einbýlishúsi og hafði alltaf fulla vasa af reiðufé.

Fréttastofa ræddi í dag við nokkur af fórnarlömbum Sigurðar en þau höfðu öll svipaða sögu að segja. Þau sögðu Sigurð vera gæddan einstökum persónutöfrum og að hann hafi komið fyrir sjónir sem ábyrgur,  trúverðugur og vel stæður maður. Við skoðun málsins í dag og samkvæmt heimildum fréttastofu er féð sem fólkið lét Sigurð hafa líklega glatað að mestu, og litlar líkur eru á að fjárhæðirnar verði endurheimtar.

Verjandi Sigurðar, Björn Ólafur Hallgrímsson, krefst sýknu í málinu. Hann gagnrýnir rannsókn lögreglu harðlega og sagði hana byggða á getgátum. Þá sagði hann að umfjöllun fjölmiðla um málið vera hina raunverulegu refsingu Sigurðar. Héraðsdómur Reykjavíkur dæmir í málinu á næstu vikum, en ákæruvaldið fer fram á þriggja ára fangelsisdóm.