Ófeigur og Gilbert fengu hvatningarverðlaun Reykjavíkur

Hvatningarverðlaun Reykjavíkurborgar, Njarðarskjöldur og Freyjusómi, voru afhent við hátíðlega athöfn í Hörpu fyrr í kvöld. Viðurkenningarnar eru veittar árlega til verslana eða verslunareigenda fyrir góða þjónustu og ferskan andblæ í ferðaþjónustu.    Í ár voru það Gilbert úrsmiður, Laugavegi 67, og Ófeigur gullsmiður, Skólavörðustíg 5, sem voru verðlaunaðir.

Skrollaðu neðst í grein til að sjá myndskeið frá verðlaunaafhendingunni.

Verslunin Gilbert úrsmiður fékk Njarðarskjöldinn en verslunin hefur skapað sér ákveðna sérstöðu hvað varðar sölu til erlendra ferðamanna og hefur salan hjá fyrirtækinu aukist jafnt og þétt á milli ára.

Helsta vörumerki fyrirtækisins er JS Watch co. Reykjavík  þar sem er íslenskt hugvit, hönnun og framleiðsla eru innblásin af hinni síbreytilegu íslensku náttúru.

Ófeigur gullsmiðja, hlaut Freyjusómann fyrir gott fordæmi og ferska nálgun í verslunarrekstri á ferðamannamarkaði árið 2013.

Ófeigur gullsmiðja er fjölskyldufyrirtæki sem hefur verið starfandi frá 1992 og hefur ávallt leitað frumlegra leiða til að hafa jákvæð áhrif á nærumhverfi sitt með því að tvinna saman séríslenska framleiðslu, listviðburði, menningarstarf og verslunarrekstur.

Ófeigur Björnsson, gullsmíðameistari og myndhöggvari, og kona hans Hildur Bolladóttir, kjólameistari og hönnuður, hafa rekið verslunina Ófeigur gullsmiðja frá upphafi með mikilli prýði og hafa undanfarin misseri einnig notið sívaxandi krafta sonar síns Bolla Ófeigssonar, gullsmíðameistara.