Löggurnar sitja saman á Alþingi - „Það er alltaf gaman að vera nálægt Geir Jóni“

„Það vill svo heppilega til að við sitjum hlið við hlið lögreglumennirnir,“ segir Vilhjálmur Árnason, þingmaður Sjálfstæðisflokksins. Þeir Vilhjálmur og Geir Jón Þórisson, einnig þingmaður Sjálfstæðisflokksins, sitja við hliðina hvor á öðrum á Alþingi.

„Það er alltaf gaman að vera nálægt Geir Jóni.“

Geir Jón var yfirmaður Vilhjálms þegar hann starfaði í lögreglunni á höfuðborgarsvæðinu. „Þá sagði hann mér til en núna hjálpa ég honum, þannig að hlutverk okkar hafi snúist við,“ segir Vilhjálmur sem segir þó að aðstoðin felist aðallega í að sýna Geir Jóni almenn vinnubrögð.

„Það er líka gaman að segja frá því að við vorum saman fyrir utan þinghúsið í búsáhaldabyltingunni í upphafi árs 2009, þar sem við stóðum vörð um þinghúsið. Þar stóðum við hlið við hlið en núna sitjum við hlið við hlið innandyra,“ segir Vilhjálmur.

Það sem breyst hafi eftir að Geir Jón kom er að Vilhjálmur var löggan á þinginu. „Nú er ég orðinn litla löggan og hann er stóra löggan,“ segir Vilhjálmur. „En það er mjög gaman að fá hann.“