Sakaður um að hafa flett upp upplýsingum um 45 konur

Ríkissaksóknari hefur birt lögreglumanninum í LÖKE-málinu ákæru fyrir tvö meint brot í opinberu starfi. Annars vegar er lögreglumaðurinn sakaður um að hafa á sex ára tímabili flett upp nöfnum 45 kvenna í málaskrárkrefi lögreglunnar, LÖKE, án þess að uppflettingarnar tengdust skyldum hans í starfi.

Hins vegar að hafa sent skilaboð á Facebook með upplýsingum sem leynt áttu að fara. Varðar fyrra brotið fyrir 139. grein almennra hegningarlaga en hið síðara við 136. grein. Málið verður þingfest í Héraðsdómi Reykjavíkur að morgni þriðjudagsins 19. ágúst.

„Ákæran byggir ekki á neinum gögnum um að brot hafi átt sér stað, heldur er hér reynt að færa sönnunarbyrði á ákærða eftir að harkalegar aðgerðir lögreglu leiddu ekki í ljós neinn leka eða deilingu á upplýsingum úr LÖKE,“ segir Garðar Steinn Ólafsson, lögmaður ákærða, í yfirlýsingu til fjölmiðla.

Garðar segir að ekkert liggi fyrir um að skjólstæðingur sinn hafi flett upp einum eða neinum í annarlegum tilgangi, heldur hafi verið tekið úrtak af öllum kvenmannsnöfnum sem fram koma á Facebook eða í síma hans og það athugað hvort hann hafi einhverntíman flett upp máli sem tengjast þeim.

„Eins og allir sem skilja tölfræði gera sér grein fyrir hafa allir lögreglumenn flett upp málum sem tengjast fólki sem þeir eða einhver vinur þeirra þekkir með nafni. Ákæruvaldið heldur því hins vegar fram með þessari ákæru að hafi lögreglumaður ekki verið lögreglumaður á vettvangi eða geti þulið upp eftir minni hvaða málum öll 10+ tölustafa málsnúmer sem þeir hafa flett upp tengist sé um að ræða brot í opinberu starfi.“

Lögmaðurinn telur ákæruna bera þess vott að nauðsynlegt sé að breyta LÖKE-kerfi til að leyfa skrásetningu í það um ástæðu uppflettinga. Ekki sé hægt að taka galla kerfisins út á einum lögreglumannni.

„En reyndar má velta því fyrir sér á hverju aðrir lögreglumenn mega eiga von á í framhaldi. Það er augljóst að sambærilegu slembiúrtaki af símum þeirra og Facebook mætti beita til að ákæra hvern einasta lögreglumann á Íslandi sem hefur verið að störfum frá 2007 til dagsins í dag."

Ákæruliðina tvo má sjá í heild sinni hér að neðan

1. Með því að hafa á tímabilinu 7. október 2007 til 16. nóvember 2013 flett upp nöfnum 45 kvenna í málaskrárkerfi lögreglu og skoðað þar upplýsingar um konunar, án þess að uppflettingarnar tengist starfi hans sem lögreglumanns, og þannig misnotað stöðu sína í því skyni að afla sér upplýsinga um konunar.

Telst þetta varða við 139. gr. alm. hgl.

2. Með því að hafa þann 20. ágúst 2012 sent tölvuskeyti á Facebook með upplýsingum sem leynt áttu að fara, þ.e. nafn og lýsingu á aðila sem lögregla hafði afskipti af, auk upplýsinga um ástæðu afskiptana.

Telst þetta varða við 136. gr. alm. hgl.