Maliki víkur úr embætti

Nouri al-Maliki hefur sagt sig frá embætti forsætisráðherra Íraks og heitið eftirmanni sínum, Haider al-Abadi, fullan stuðning sinn.

Þetta kom fram í ríkissjónvarpi Íraks í kvöld.

Al-Abadi er flokksbróðir al Malíkis og báðir eru þeir sjía-múslimar. Dawa-flokkurinn þeirra er stærsta afl sjía-múslima á þingi.



Ákvörðun hans var sögð skref í átt að aukinni einingu landsins en hún kemur einungis örfáum dögum eftir að hann neitaði hatrammlega að víkja úr embætti. Í sjónvarpsávarpi í gær ítrekaði hann ásakanir sínar um að forseti landsins hefði brotið stjórnarskrá landsins með því að fela al-Abadi, varaforseta þingsins, að mynda nýja ríkisstjórn.

„Maliki mun draga mótmæli sín til baka og styðja við bakið á útnefndum forsætisráðherra,“ er haft eftir talsmanni al-Malikis á fréttaveitunni AFP og var þar vísað til lögsóknar sem fráfarandi forsætisráðherra hafði hótað í kjölfar útnefningar Haiders al-Abadis.

Nouri al-Maliki hefur á síðustu misserum einangrast mikið í flokki sínu og talið er að hann hafi misst stuðning fjölda bandamanna sinna úr röðum sjía-múslima.

Hann hefur misst nánast allan stuðning bæði á þingi og meðal leiðtoga annarra landa eftir að vígamenn náðu undir sig stórum hluta landsins. 

Sameinuðu þjóðirnar hafa varað við því að neyðarástand vofi yfir flóttafólki, sem hrakist hefur undan sókn vígamannanna í norðanverðu Írak.

Verðandi forsætisráðherra hefur samkvæmt stjórnarskrá landsins 30 daga til að skipa nýja ríkisstjórn frá því að hann tekur við embættinu á mánudag. Fram að því mun Nouri al-Maliki gegna stöðu forsætisráðherra og vera æðsti yfirmaður hersins.