„Ég slapp ótrúlega vel miðað við aðstæður“

„Ég slapp ótrúlega vel miðað við aðstæður,“ segir Grétar Vilhjálmur Reynisson, starfsmaður Rafmagnsveitna ríkisins. Grétar brann í andliti við vinnu við nýja jarðspennustöð við botn Eskifjarðar á þriðjudaginn.

Grétar, sem er 52 ára, var ásamt tveimur kollegum sínum við vinnu við háspennustöðina þegar skammhlaup varð. Voru þeir að tengja saman háspennugafla þegar spennan komst til jarðar.

„Það sló út og myndaðist eldsúla,“ segir Grétar sem skýtur á að blossinn, sem kastaðist fram á móti honum, hafi verið um rúmmetri að stærð.

„Þetta var risablossi sem maður lendir í. Þá brennur allt sem verða vill,“ segir Grétar sem var á leið heim til sín á Egilsstaði þegar Vísir náði tali af honum. Hann hefur dvalið á Fjórðungssjúkrahúsinu á Neskaupstað undanfarnar tvær nætur.

Grétar segist ekki hafa verið klæddur í sérstakan öryggisgalla en hafi þó verið með öryggisgleraugu.

„Gleraugun björguðu því sem bjargað varð,“ segir Grétar og bætir við að hann hafi verið með húfu og vettlinga. Hann hafi ekki gengist undir aðgerð heldur verið hlúið að honum með kæligrisjum, geli og vaselíni. Hann sé rauður og fjólublár í framan og vanti á augabrúnirnar. Hann er þó bjartsýnn á bata sinn.

„Þetta ætti nú allt að fara og ég að verða jafngóður aftur.“

Grétar segir líðan sína góða en reiknar þó með að verða frá vinnu næstu tvær vikurnar eða svo.

„Ég verð heima og ber krem á andlitið. Passa að það komist ekki sýking í sárin,“ segir Grétar sem lætur vel af veru sinni á sjúkrahúsinu á Neskaupstað.

„Það var eins og á hóteli.“

Rarik hefur þegar sent mann frá Rafskoðun, skoðunarstofu á rafmagnssviði, til að rannsaka hvað úrskeiðis fór.