170 milljónir frá landbúnaðnum alla daga ársins

Íslenskur landbúnaður skilar 170 milljónum krónum á dag í þjóðarbúið og greinin skaffar tólf þúsund störf, þar af um eitt þúsund á höfuðborgarsvæðinu. Á sama tíma er helmingur á öllum þeim mat sem við neytum fluttur inn til landsins.

Í nýjasta leiðara Bændablaðsins fer Sindri Sigurgeirsson, formaður Bændasamtaka Íslands yfir stöðu landbúnaðars og hvað greinin skilar miklum peningum til samfélagsins. Í tölum sínum styðst hann við hagreikninga landbúnaðarins, sem Hagstofa Íslands hefur gefið út en þar er farið yfir afkomu greinarinnar frá 2007 til 2013.

“Verðmæti landbúnaðarins er um 62 milljarðar  ár ári, eða 170 milljónir hvern einasta dag ársins.  Þetta eru miklir fjármunir og því ágætt að ramma það aðeins betur inn að landbúnaðurinn skiptir virkilega máli”, segir Sindri.

Á sama tíma og landbúnaðurinn gefur góðar tekjur í þjóðarbúið er helmingur allra matvæla, sem þjóðin neytir flutt til landsins eða fyrir 50 milljónir á hverjum degi.  Sindri segir að þarna þurfi að gera betur.

“Þetta er að sjálfsögðu alltof mikið en með tiliti til hnattrænnar stöðu okkar þá er ekkert mjög auðvelt að framleiða t.d. banana á Íslandi en það má kannski hugsa það með að nýta þau tækifæri, sem við höfum og þá orku sem við höfum, t.d. fallvötnin, við gætum betur nýtt rafmagn og þessi gróðurhús okkar til að framleiða meira af ávöxtum grænmeti. Við ættum að sækja fram sem aldrei fyrr í íslenskum landbúnaði”, bætti Sindri við.