Rafiðnaðarsamband Íslands mótmælir kaupaukafrumvarpi

Miðstjórn Rafiðnaðarsambands Íslands mótmælir harðlega lagafrumvarpi þar sem kveðið er á um að heimilt verði að greiða kaupauka til starfsmanna fjármálafyrirtækja sem samsvarar tvöföldun árslauna.

Segir í ályktun stjórnarinnar að það sé stjórnvöldum til háborinnar skammar að leggja línu um slíka óráðsíu innan fjármálafyrirtækja og er fjármálaráðherra hvattur til að breyta frumvarpi sínu á þann hátt að bónusar umfram hefðbundna bónusa verði ekki greiddir, eða að öðrum kosti beita sér fyrir að slíku kaupaukakerfi verði komið á hjá almennum launþegum hið fyrsta.

Segir enn fremur að stjórnvöldum sé í lófa lagið að draga úr misskiptingu í samfélaginu en það verði ekki gert með slíkum öfgum í aðra átt. Réttara væri að nýta allt mögulegt svigrúm til þess að hækka laun á almennum vinnumarkaði í stað slíkrar óráðsíu.

Enn að ekki sé boðlegt að stjórnvöld fari fram með þessum hætti þegar almennt launafólk þessa lands leiti leiða til þess að skapa stöðugleika með hóflegum launahækkunum.