Ætla að vekja athygli á Vestfjörðum

Sveitarfélögin á Vestfjörðum ásamt samstarfsaðilum á landsvísu og ferðaþjónum á Vestfjörðum hafa ákveðið að fara af stað í þriggja ára markaðsátak en þetta kemur fram í fréttatilkynningu frá Markaðsstofa Vestfjarða.

Verkefninu verður stýrt af Markaðsstofu Vestfjarða en þetta er stærsta markaðsverkefnið sem sveitarfélögin hafa farið í frá upphafi. Verkefninu er ætlað að vekja athygli á Vestfjörðum sem áfangastað ferðamanna og ýta undir þá jákvæðu ímynd sem Vestfirðir hafa nú þegar.

Verkefnið snýst að töluverðu leyti um starfrænt ferðalag um Vestfirði sem verður samansett af áhugaverðu myndefni sem sýnir allt það sem Vestfirðir hafa upp á að bjóða. Það eru mjög margir sem þurfa að koma að borðinu til þess að svona stórt og ítarlegt verkefni geti gengið upp, ber þar að nefna samstarfsaðila líkt og Icelandair, Flugfélag Íslands, Hertz, Símann, N1 og ferðaþjónar á Vestfjörðum.

Markaðsátakið verður unnið með Tjarnargötunni og segir Díana Jóhannsdóttir markaðsfulltrúi Markaðsstofu Vestfjarða þetta vera spennandi tíma framundan í ferðaþjónustu á Vestfjörðum og gaman sé að sjá hversu vel allir taki í það að vinna að því að koma Vestfjörðum á kortið.

„Við erum ákaflega spenntir fyrir þessu flotta verkefni. Við erum að byrgja okkur upp af nýjum búnaði og hlökkum til að fanga íslenska náttúru og koma henni til skila á nýstárlegan máta,“ segir Einar Ben, annar eigandi Tjarnargötu.