Skemmdarverk á búnaði Útvarps Sögu kærð til lögreglu

„Við erum búin að kæra þetta til lögreglunnar,“ segir Arnþrúður Karlsdóttir, útvarpsstjóri Útvarps Sögu, um skemmdarverk sem unnin hafa verið á búnaði stöðvarinnar að undanförnu.

„Lögreglumenn komu hérna áðan og könnuðu vettvang,“ útskýrði Arnþrúður ennfremur.

Arnþrúður segir röð bilana í tölvum og símkerfi stöðvarinnar vera lyginni líkust. „Símstöðvakerfið okkar brann yfir. Útsendingatölvan fór, önnur tölva bilaði. Allir símar eru búnir að vera í lamasessi undanfarið,“ útskýrir Arnþrúður og bætir við: „Ef þetta er röð af tilvikum, þá er það algjörlega ótrúlegt,“ segir Arnþrúður.

Hún segir að öryggiskerfi í húsnæði stöðvarinnar hafi verið tekið af í nótt. „Það getur verið vísbending um að einhver ætli sér að brjótast inn,“ útskýrir Arnþrúður.

Góðar græjur

Arnþrúður segir að tæki stöðvarinnar hafi ekki getað bilað öll í einu, með svo litlu millibili. „Tækin hafa verið uppfærð reglulega. Ég er búin að reka stöðina í rúman áratug og passa upp á að hafa góðar græjur.“

Hún vakti athygli á málinu í útvarpsþætti sínum í morgun og mátti auðveldlega greina pirring í rödd hennar og orðavali. „Maður verður argur og pirraður þegar maður lendir í ítrekuðum skemmdarverkum og þegar maður verður argur í beinni útsendingu – hvað gerir maður þá? Þegar mann langar að bölva – þá er það eiginlega bölvanlegt að geta ekki bölvað í beinn.“

Veit ekki hverjir eru að verki

Arnþrúður segist ekki vita hverjir geti hafa verið að verki þarna. „Við á Útvarpi Sögu höfum verið að stinga á alls kyns kýli og syndum á móti strauminum. Ég geri mér ekki grein fyrir því hver stendur á bakvið þessi verk. Við vitum að það eru undirheimaklíkur á Íslandi. Við vitum um allavega fjórar sem eru mjög virkar og taka að sér allskyns óþverra fyrir aðra gegn greiðslu.“

Arnþrúður segir ömurlegt að reka fyrirtæki við svona aðstæður. „Það er ótrúlegt að geta ekki fengið að vera með þetta í friði. Fólk talar oft um að það fái engin tækifæri í lífinu. Svo fer maður af stað og byrjar að reka sitt eigið fyrirtæki og þá er eilíft verið að reyna að skemma fyrir manni,“ segir Arnþrúður að lokum.