Minna reykt og betur burstað

Andleg líðan Íslendinga hefur versnað frá hruni, þá helst með auknu þunglyndi og streitu. Þetta kemur fram í doktorsritgerð Christophers Bruce McClure við læknadeild Háskóla Íslands. Hann ver ritgerðina á morgun, en hún nefnist „Andleg líðan og heilsutengd hegðun í kjölfar efnahagsþrenginga – Áhrif á Ísland“.

Markmið rannsóknarinnar var að grannskoða áhrif efnahagshrunsins á andlega líðan og heilsutengda hegðun.

Einnig komu fram breytingar á tannheilsu og algengi reykinga. MacClure segir það líklegt að fólk sé nú duglegra að bursta tennurnar og nota tannþráð vegna þess hve kostnaðarsamt það sé að fara til tannlæknis.

Þá benda niðurstöðurnar til þess að efnahagshrunið 2008 hafi haft sérlega slæm áhrif á streitu kvenna. McClure segir ástæðu fyrir því kunna að vera að konur séu bæði á vinnumarkaði og sjái að miklu leyti um uppeldi og umsjón barna. Það sé sambærilegt því að sinna tveimur störfum. Samanlagt hefur slíkt vinnuálag ásamt auknum fjárhagsvandkvæðum sökum hrunsins mjög líklega talsverð áhrif til aukinnar streitu. - kóh