Auglýsingatekjur af síðu Eiríks Jónssonar um fimm milljónir

Auglýsingatekjur af vefsíðunni Eirikurjonsson.is, sem er í eigu félagsins Eiríkur Jónsson ehf voru tæpar fimm milljónir króna árið 2013. Tekjurnar þrefölduðust milli ára, frá 2012, en Eiríkur segir að það skýrist af því að síðan var ekki uppi allt árið 2012. Hún fór í loftið í apríl það ár.

Tap var af rekstri fyrirtækisins bæði árin, en það minnkaði umtalsvert í fyrra. Árið 2012 var 1,7 milljón króna tap á rekstrinum en árið 2013 nam tapið um 70 þúsund krónum.

Eiríkur segist annars vera ánægður með árangurinn, 4,8 milljónir í auglýsingatekjur. En segist ekkert vita um tapið á rekstrinum. „Þú verður að spyrja endurskoðandann út í það.“ Á síðunni birtist mikill fjölda frétta, en Eiríkur segist ekki skrifa þær allar. „Nei, ég er með um tuttugu fréttararitara út um allt. Margir fyrrum blaðamenn. Ég ritstýri bara vefnum.“

Í ágúst var vefsíðan til umfjöllunar þegar Þorsteinn Guðnason, sem var að kaupa hlut í DV ehf, notaði sömu reikniformúlu og var notuð til reikna út virði vefsíðunnar DV.is til þess að reikna út virði vefsíðunnar eirikurjonsson.is. Þá fékk Þorsteinn út að vefsíða Eiríks væri 43 milljón króna virði. 60 prósenta hlutur sem er í eigu DV ehf væri 26 milljón króna virði og þá 40 prósenta hlutur í eigu Eiríks væri 17 milljóna virði.

Eiríkur sagðist þá ekki hafa haft hugmynd um að hann ætti allar þessar milljónir. „„Þarna eru notaðar sömu reiknikúnstir og notaðar eru til að reikna út virði annarra fjölmiðla. Þetta er sett inn í einhverja formúlu, sem allir nota virðist vera, og þá er þetta niðurstaðan. Ég hef aldrei komið nálægt þessu. Ég veit í raun ekkert meira um þetta.“

Hann bætti við: „Það er hægt að reikna allan andskotann. Það er hægt að reikna ríkisbúskapinn alveg upp úr öllu valdi. Það fer bara eftir því hvernig menn reikna. Ég veit ekkert um hvernig menn gerðu það. Ég hef aldrei reiknað þetta út.“

Eiríkur hafði ekki áður heyrt að sextíu prósenta hlutur í síðunni væri 26 milljóna króna virði. „Nei,nei ég hef aldrei heyrt þetta. Enda eru það einhverjir aðilar úti í bæ sem eiga þetta og þetta er matið á því. Þannig að þau fjörutíu prósent sem ég á eftir eru þá sautján milljóna króna virði,“ sagði hann í samtali við Vísi í ágúst. Hann bætti við að vefurinn væri til sölu fyrir þessa upphæð, en hefur ekki enn náð að selja sinn hlut fyrir 17 milljónir.

Vísir sagði frá því í mars árið 2012 að vefur Eiríks væri kominn í loftið. Þá sagði fjölmiðlamaðurinn reyndi: „Þetta er nýr vefur sem byggir á löngum ferli mínum. Ég hef verið að blogga á Eyjunni með 35 til 40 þúsund lesendur á viku og þetta byggir á því. En það verður meira á síðunni og þetta verður nýstárlega sett upp."

Þá kom fram að fjársterkir aðilar hefðu komið að stofnun hlutafélagsins Eiríkur Jónsson ehf. Þessir aðilar fengu sextíu prósenta hlut í hlutafélaginu og hélt Eiríkur eftir fjörutíu prósentum.