Var 99 prósent viss um að þetta væri Rolex-eftirlíking

„Þetta er í fyrsta sinn sem ég tel sannarlega að sá sem kom hingað hafi talið úrið miklu meira virði en það var í raun og veru,“ segir Sverrir Einar Eiríksson sem rekur verslunina Kaupum gull í Kringlunni.

Í vikunni birtist frétt á mbl.is þar sem rætt var við úrsmíðameistarann Frank Úlfar Michelsen, sem tjáði viðskiptavini sínum að Rolex-úr sem hann ætti væri eftirlíking. Viðskiptavinurinn kom fyrst til Sverris, sem benti á Frank.

„Hann kom hingað fyrst og ég var 99 prósent viss um að þetta væri eftirlíking. Ég bað hann að fara með úrið í Michelsen og fá álit þeirra líka, til þess að vera alveg viss,“ segir Sverrir. Hann segir þetta ekki gerast oft, að einhver haldi að hann sé með ekta úr, en sé í raun með eftirlíkingu. „Mér skilst að hann hafi keypt úrið á fimm þúsund og fimm hundruð dollara í búð úti í New York. Það bendir allt til þess að þetta sé satt.“ Fimm þúsund og fimm hundruð dollarar eru rúmlega 680 þúsund krónur, þannig að úrið hefur verið ansi dýrt.

Í samtali við mbl.is sagði Frank að hann hefði strax séð að úrið væri ekki alvöru. „Þegar ég sé kass­ann finnst mér strax eitt­hvað ekki passa. Ég þekki þessa vöru mjög vel en þetta get­ur blekkt þann sem ekki þekk­ir til. Þetta var svona fjar­skafag­urt. Svo þegar ég fæ úrið í hend­urn­ar sé ég að áferðin á stál­inu er ekki rétt og úrið var aðeins of létt. Jafn­framt á hring­ur­inn meðfram gler­inu, sem er kallaður „besel“, að vera úr kera­miki en á þessu úri var hann úr málmi.“

Frank sagði að hann vissi um nokkra sem hefðu keypt fölsuð úr sem það taldi vera alvöru:

„Því miður gerist það að fólk sé blekkt. Svikararnir hugsa auðvitað að það séu litlar sem engar líkur á að útlendingar sem kaupa þessi úr komi aftur og kvarti,“ segir hann.

„En það er yfir­leitt þannig að ef að sagan er of góð til að vera sönn er hún yfirleitt ósönn.“

Á vefnum Business Inisder eru ráð til þess að sjá hvort að Rolex úr sé alvöru eða ekki. Eitt ráðið er að fylgjast með því hvort að það heyrist svokallað „tikk takk“ hljóð úr því. Ef svo er mun úrið mjög líklega vera eftirlíking. Rapparinn Jay-Z útskýrði þetta einnig í laginu Ni**as in Paris, sem hann samdi ásamt Kanye West. Þar sagðist hann ekki eiga Rolex sem heyrðist „tikk takk“ í og sagðist eiga Audemars Piguet úr sem gleymdu tímanum (og vísaði þar til þess að slík úr þarf að trekkja upp).

Á vef Business Insider er einnig bent á að fölsuð Rolex úr séu yfirleitt léttari en alvöru úr. Trekkjarinn á alvöru úrunum er líka talsvert íburðarmeiri en á þeim fölsuðu. Í greininni á Business Insider kemur einnig fram að glerið í alvöru úrunum sé sérstakt; glerið sem er yfir þeim hluta úrsins sem sýnir dagsetninguna er stækkunargler. Fáir úrsmiðir ná að leika þetta eftir.

Hér að neðan má hlusta á lag Jay-Z og Kanye West þar sem þeir tala um Rolex úr sem heyrist ekkert „tikk takk“ hljóð í.