Segir hóp lögfræðinga stjórna Hæstarétti

„Það sem er að í okkar dómskerfi er að hér eru menn skipaðir í dómarastarf án þess að nokkur viti áður fyrirfram hvaða skoðanir menn hafa á grundvallaratriðum á starfsháttum dómsstóla,“ segir Jón Steinar Gunnlaugsson, í viðtali í þættinum Bítið á Bylgjunni í morgun.

Jón varpar nokkrum sprengjum í nýrri bók, „Í krafti sannfæringar - Saga lögmanns og dómarar“.

„Mínar skoðanir fela í sér að takmarka vald dómsstóla. Samt var ég talinn eitthvað pólitískur af því að ég hafði haft skoðanir á pólitík og þjóðlífsmálum. Auðvitað var ég minnst pólitíski dómarinn af þeim öllum.“

Jón segir það óþægilega tilhugsun að fá á tilfinninguna að lögmenn séu misjafnlega vinsælir hjá dómarahópnum. 

Aðspurður hvort dómarar myndi einhverja klíku hér á landi til að viðhalda valdi svaraði Jón; „Mikið vildi ég geta svarað þessari spurningu neitandi, ég get það bara ekki. Klíkumyndum er kannski stórt orð en ég reyni að skýra þetta út í bókinni.“

Jón segir hóp lögfræðinga sem stýri Hæstarétti og hafi stjórn á réttarfarsnefnd. 

„Það er fáránlegt að hæstaréttadómarar sitji í nefnd sem hafi það hlutverk að semja lagafrumvarp. Þannig hefur þetta verið í áratugi á Íslandi. Þeir vilja hafa afskipti með því þegar skipa á nýja dómara. Fyrir tveimur til þremur árum síðar var lögum breytt þannig að nefnd sem Hæstiréttur hefur undirtökin í ræður því einfaldlega hverjir verða nýir dómarar.“

Jón biðlaði til þjóðarinnar og allra stjórnmálamanna að þrýsta á það að hér á Íslandi væri starfandi Hæstiréttur sem starfaði undir nafni. 

„Það er virkilega mikið að í okkar dómskerfi og við þurfum einfaldlega að bretta upp ermar og laga það sem að er. Það hefur verið mitt erindi, bæði með ritgerð sem ég skrifaði í fyrra og með þessari bók.“

Jón segist hafa fengið almennt góð viðbrögð við bók sinni. Jón Steinar, sem er fyrrum Hæstaréttardómari og lögmaður, gaf út bókina á fimmtudaginn.