Mercedesmenn fljótastir á föstudegi og Chilton mun keppa

Nico Rosberg á Mercedes var fljótastur á fyrri æfingu dagsins fyrir belgíska kappaksturinn sem fram fer um helgina. Liðsfélagi hans, Lewis Hamilton var fljótastur á seinni æfingunni á Spa brautinni. Max Chilton hefur endurheimt sæti sitt hjá Marussia.

Fyrri æfingin var tíðinda lítil. Rosberg varð fljótastur og Hamilton annar, þriðji varð Fernando Alonso á Ferrari. Hraði Alonso kemur á óvart en Spa brautin er mjög hröð. Ferrari bíllinn er það hins vegar ekki.

Jenson Button á McLaren varð fjórði, Kimi Raikkonen á Ferrari fimmti og Sergio Perez á Force India sjötti.

Williams tókst ekki að sýna styrk sinn á æfingunni, Valtteri Bottas varð tíundi og Felipe Massa varð fimmtándi.

Nýji maðurinn hjá Caterham, André Lotterer, varð fljótari en Marcus Ericsson. Hjá Marussia var Jules Bianchi hins vegar fljótari en Alexander Rossi sem ekur fyrir Max Chilton um helgina.

Seinni æfingin hófst með því að Pastor Maldonado snéri Lotus bíl sínum á varnarvegg. Rauðum flöggum var þá veifað og æfingin tafðist. Esteban Gutierrez snéri Sauber svo bíl sínum og aftur var rauðum flöggum veifað.

Þegar æfingin hófst á ný gat enginn ógnaði tíma Hamilton. Rosberg komst næst en var þó rúmlega 0,6 sekúndum á eftir Hamilton.

Alonso varð aftur þriðji en Massa á Williams varð fjórði og Bottas á Williams varð sjötti. Button á McLaren varð fimmti á milli Williams bílanna.

Max Chilton hefur fengið sæti sitt aftur hjá Marussia eftir að hann bauðst til að stíga til hliðar til að hjálpa liðinu. Hann verður að standast álagið, það er greinilegt að Marussia veigrar sér ekki við að sparka honum ef hann stendur sig ekki.