Alfreð og félagar lögðu Rhein-Neckar Löwen í úrslitaleik

Þýska handknattleiksliðið Kiel vann sigur á Klaus-Miesner æfingamótinu sem haldið var í Ilsenburg um helgina.

Kiel lék tvo leiki á laugardaginn. Fyrri leikurinn gegn Bergischer vannst með tveggja marka mun, 32-30. Aron Pálmarsson skoraði tvö mörk fyrir Kiel, en félagi hans í íslenska landsliðinu, Björgvin Páll Gústavsson, stóð í marki Bergischer fyrstu 19 mínútur leiksins.

Í seinni leiknum á laugardaginn unnu Alfreð Gíslason og lærisveinar hans danska liðið Skjern með fimm marka mun, 34-29. Aron skoraði fjögur mörk fyrir Kiel í leiknum.

Í úrslitaleiknum á sunnudaginn mætti Kiel Rhein-Neckar Löwen. Eftir jafnan leik framan af gáfu leikmenn Kiel í undir lok fyrri hálfleiks og þegar flautað var til leikhlés var staðan 14-8, Kiel í vil.

Löwen tókst að minnka muninn í eitt mark, 16-15, eftir tíu mínútna leik í seinni hálfleik, en þá tóku þýsku meistarnir aftur við sér. Þeir skoruðu sex mörk gegn einu Löwen-manna og unnu að lokum sex marka sigur, 29-23.

Marko Vujin var markahæstur í liði Kiel með fimm mörk, en Aron, Dominik Klein, Filip Jicha, Nicklas Ekberg og Steffen Weinhold komu næstir með fjögur mörk hver.

Stefán Rafn Sigurmannsson skoraði tvö mörk fyrir Löwen.