Lindsay Lohan vildi ekki verða svona fræg

Lindsay Lohan var í viðtali við BBC um fyrirhugaða flutninga sína til London, en hún kemur til með að flytja þangað til þess að leika í Speed-the-Plow, leikriti eftir David Mamet.

„Fólk hefur einhverja mynd af mér. Í langan tíma leit fólk á mig sem fræga, sem er eitthvað ég vildi aldrei. Það var ekki þess vegna sem ég fór að leika,“ sagði leikkonan meðal annars í viðtalinu.

„Ég hef verið að leika síðan ég var þriggja ára og á kvikmyndasetti síðan ég var sex. Fólk virðist hafa gleymt því og ég held að tíminn sé núna,“ segir hún um endurkomu sína í bransann.

„Og ég held að besta leiðin til þess sé að gera það á sviði í London með ótrúlega hæfileikaríku fólki þannig að fólk geti einblínt á það að ég er í þessum iðnaði vegna þess að ég er leikkona.“

Lohan sagðist einnig vera orðin vænisjúk eftir að hafa verið á forsíðum slúðurblaðanna svo lengi.

„Ég held að vinum mínum finnist ég nevrótísk á köflum og dálítið biluð, en ég heyri þegar verið er að smella af á iPhone. Ég heyri klikkið úr kílómetra-fjarlægð.“