Enn heldur Leiknir hreinu | Vandræði Grindvíkinga halda áfram

Tveimur leikjum er lokið í 1. deild karla í knattspyrnu.

Leiknir R. bar sigurorð af Víkingi Ó. með tveimur mörkum gegn engu í stórleik umferðarinnar. Sindri Björnsson skoraði fyrra markið á 70. mínútu og Matthew Horth það síðara í uppbótartíma.

Með sigrinum komst Leiknir á topp deildarinnar, allavega um stundarsakir, en ÍA getur endurheimt toppsætið sigri liðið BÍ/Bolungarvík í leik sem hófst kl. 15:00.

Þetta var í sjötta sinn sem Leiknir heldur hreinu í deildinni í sumar, en liðið hefur aðeins fengið á sig þrjú mörk í átta leikjum.

Vandræði Grindvíkinga halda áfram, en liðið tapaði 1-2 fyrir nýliðum HK á heimavelli.

Davíð Magnússon kom HK yfir á 40. mínútu en Joseph David Yoffe jafnaði metin á 54. mínútu. Það var síðan Guðmundur Atli Steinþórsson sem skoraði sigurmark HK-inga úr vítaspyrnu á 78. mínútu, en þetta var sjötta mark Guðmundar í deildinni í sumar.

Grindvíkingar sitja í 11. og næstsíðasta sæti með aðeins fimm stig, en HK er í 5. sæti með 14 stig.

Upplýsingar um úrslit og markaskorara eru fengnar af urslit.net.