„Ótrúlegt að það hafi tekið allan þennan tíma að fá að veita 118 eðlilega samkeppni“

Nýtt fyrirkomulag á miðlun upplýsinga símaskrá tekur gildi þann 1. júlí næstkomandi en í gær birtir Póst- og fjarskiptastofnun leiðbeinandi verklagsreglur til fjarskiptafyrirtækja um skráningu og miðlun slíkra upplýsinga.

Þar kemur fram að farið sé yfir hvernig best sé að samræma tæknilega framkvæmd á miðlun upplýsinganna, fyrir þau fjarskiptafyrirtæki sem úthluta símanúmerum. Markmiðið sé að tryggja skilvirkni og jafna samkeppnisstöðu aðila og voru reglurnar unnar í samráði við hagsmunaaðila.

„Útgáfa rafrænnar og prentaðrar símaskrár ásamt upplýsingaþjónustu um símanúmer telst til alþjónustu, sem eru tilteknir þættir fjarskiptaþjónustu sem skulu standa öllum landsmönnum til boða á viðráðanlegu verði. Lengst af hvíldi sú skylda að veita þessa þjónustu á Símanum hf. (og forverum hans) og síðar á fyrirtækinu Já upplýsingaveitum hf. Reynsla undanfarinna ára hefur leitt í ljós að forsendur eru til þess að þessi þjónusta sé boðin fram á markaðsforsendum,“ segir í frétt á vef Póst- og fjarskiptastofnunnar.

Með tilliti þessa sendi Póst- og fjarskiptastofnun frá sér samráðsskjal á síðasta ári þar sem kynnt voru áform stofnunarinnar um að aflétta kvöðinni á Já upplýsingaveitum hf. um að halda úti rafrænni símaskrá og um að veita upplýsingaþjónustu um símanúmer.

„Niðurstaða samráðsins leiddi í ljós að Já var tilbúið að skuldbinda sig til útgáfu prentaðrar símaskrár til þriggja ára án sérstakrar kvaðar þar um og tók stofnunin, á grundvelli þess, ákvörðun, sem birt var þann 20. desember sl. um að leggja ekki slíka kvöð á ný á félagið.“

Fram kemur í tilkynningu frá stofnuninni að til að jafna samkeppnisstöðu milli Já upplýsingaveitna hf. og annarra aðila sem hyggjast starfrækja upplýsingaþjónustu um símanúmar hefur númerið 118 verið afturkallað með hæfilegum aðlögunartíma.

Skal notkun þess hætt eigi síðar en 30. júní 2015 og símaskrárupplýsingar verða framvegis veittar í númeraröðinni 1800-1899.

Löng baráttaAð sögn Andra Árnasonar framkvæmdastjóra Miðlunar, er þessi úrskurður mikill áfangasigur fyrir félagið. Barátta Miðlunar fyrir samkeppni á jafnræðisgrundvelli á þessum markaði hefur staðið yfir í mörg ár.

„Miðlun hefur barist við þennan Golíat í áraraðir og loks hillir undir að við fáum að keppa á jafnréttisgrundvelli við Já upplýsingaveitur. Já eða 118 hefur verið í einokunaraðstöðu á þessum markaði í langan tíma og hækkað verð þjónustunnar til neytenda jafnt og þétt, langt umfram verðlagsþróun. Það er ótrúlegt að það hafi tekið allan þennan tíma að fá að veita 118 eðlilega samkeppni“ segir Andri.

Samkeppniseftirlitið er ennþá með til umfjöllunar kæru Póst- og fjarskiptastofnunar og Miðlunar á hendur Já upplýsingaveitum. Fram kemur í yfirlýsingu frá Miðlun að nálið snúist um aðgang að þeim upplýsingum sem Já hefur fengið að safna í mörg ár. Að mati Miðlunar er jákvæður úrskurður í því máli nauðsynlegur , til þess að tryggja að Miðlun standi jafnfætis í þeirri samkeppni sem er neytendum nauðsynleg.