Flugmenn gagnrýna yfirstjórn Icelandair

„Eins og öllum er ljóst er staða samningamála komin á alvarlegt stig. Viðsemjendur okkar hafa ekki sýnt neina viðleitni til að koma til móts við kröfur okkar og halda sig fast við 2,8 prósent.“ Þetta kemur fram í fréttabréfi Félags íslenskra atvinnuflugmanna (FÍA), sem kom út í dag.

Í fréttabréfinu kemur fram að laun stjórnarformanns Icelandair Group hafi á þriggja ára tímabili hækkað um 109,2 prósent og laun stjórnarmanns Icelandair Group hafi hækkað um 211,3 prósent. Árslaun forstjóra Icelandair Group eru 44,2 milljónir og hafa þau hækkað um 13 prósent á milli ára.

„Hagsmuna hverra er forstjóri Icelandair Group að gæta með þessum aðgerðum sínum, hluthafa Icelandair Group eða SA? Formaður SA er greinilega valdameiri en forstjóri Icelandair Group. Hvenær brestur þolinmæði hluthafa gagnvart forstjóra Icelandair Group?“

Vinnustöðvun flugmanna hófst hinn 9.maí síðastliðinn. Tvö tólf klukkustunda verkföll eru boðuð 16. og 20. maí og tveggja sólarhringa verkfall er boðað 23. maí.  Náist samningar ekki hefst verkfall frá klukkan sex að morgni 30. maí til klukkan sex að morgni 3. júní.

Beint fjárhagstap kemur til með að nema um 1,5 til 1,7 milljörðum króna vari það allan þann tíma sem það hefur verið boðað. Tapaðar tekjur af frádregnum sparnaði vegna niðurfelldra fluga auk áætlaðs kostnaðar vegna aðstoðar við farþega eru hluti af fjárhæðinni. Þá eru hvorki hugsanleg áhrif yfirvinnubanns né áhrif verkfallsins á bókanir og tekjur félagsins á þeim dögum sem verkfallið stendur ekki yfir.

„Er þessi stefna gagnvart starfsmönnum, hluthöfum Icelandair Group sæmandi? Félagið er tilbúið að fórna 1500-1700 milljónum króna í stað þess að semja. Það getur ekki verið hluthöfum félagsins í hag að fyrirtækinu sé beitt sem stýritæki í sýndarleik SA í stað þess að hámarka eign hluthafa.“

Tíu stærstu hluthafar Icelandair Group eiga um 60 prósent af hlutafé félagsins. Af þessum tíu stærstu eiga lífeyrissjóðirnir 37 prósent af heildarhlutafé.

„Félagsmátturinn er það vopn sem við höfum. Nú er mikilvægara en nokkru sinni að sýna samstöðu,“ segir jafnframt í fréttabréfinu.