Staða smærri byggðarlaga áhyggjuefni

Sigurður Ingi Jóhannsson, sjávarútvegsráðherra, segir stöðu smærri byggðarlaga í sjávarútvegi vera áhyggjuefni. Byggðastofnun mun skila skýrslu strax eftir páska með leiðum til að viðhalda sjávarútvegi í smærri byggðum landsins.

Í hádegisfréttum Bylgjunnar í gær var rætt við Hannes Sigurðsson útgerðarmann í Þorlákshöfn sem sagði byggðarröskun væri stóri galli kvótakerfisins. Fjölmörg hafa allt undir því að þar sé stundaður sjávarútvegur og telur Hannes mikilvægt að kvóti renni í auknum mæli beint til byggðarlaganna.

Sigurður Ingi Jóhannsson, sjávaútvegsráðherra, telur að horfast þurfi í augu við vandann.

„Við erum auðvitað að reka sjávarútveg sem drifinn er áfram af markaðsvæðingu og hagræðingu. Það er hluti af því sem er mjög gott fyrir samfélagið en hefur auðvitað áhrif í smærri byggðum og það er áhyggjuefni,“ segir Sigurður Ingi. Varlega þurfi þó að fara í ríkisinngripum.

„Allt sem ríkið gerir, þar á meðal í opinberri innheimtu getur hvatt til frekari samþjöppunar og ýtt fyrirtækjunum út í hagræðingu hraðar en við kannski vildum og þetta er eitt af því. Ef við viljum hafa fjölbreyttan sjávarútveg á Íslandi þá þurfum við að horfa á málið í heild sinni.“

Ráðherra nefnir leiðir eins og að skilyrða hluta af kvótanum við byggðarsvæði og einnig þá hugmynd um að fiskvinnslur fái hluta af byggðarkvótanum. Allt þurfi að skoða.

„Það hefur líka verið sýnt fram á að sú leið sem við fórum í fyrrasumar með því að byggðarstofnun fékk ákveðinn hluta byggðarkvóta sem þeir geta leyst til staða til þriggja eða fimm ára gegn mótframlagi, bæði í formi aflaheimilda en einnig annarra aðgerða. Til að mynda fjölbreyttari atvinnu. Það er leið sem er mjög áhugaverð og virðist í fyrstu sýn vera mjög góð til að styrkja byggðirnar.“

Vísir hf. tilkynnti í síðasta mánuði að fyrirtækið ætli að hætta fiskvinnslu á Djúpavogi, Húsavík og Þingeyri. Ráðherra hefur rætt við stjórnendur þessara byggðarlaga.

„Ég óskaði eftir að byggðarstofnun taki málið til sérstakrar skoðunar og myndi skila skýrslu strax eftir páska. Tillögur og úrræði hvernig menn sæu fyrir sér verkefnið og hvað hugsanlega væri hægt að gera.“