ÁTVR greiðir starfsmanni sínum bætur vegna ólögmætrar uppsagnar

Konu á sextugsaldri var í Héraðsdómi í dag dæmdar tvær milljónir í skaðabætur vegna ólögmætrar uppsagnar Áfengis og tóbaksverslunar ríkisins (ÁTVR).

Konan fór hins vegar fram á 4,7 milljónir króna í bætur. Þá er ÁTVR gert að greiða konunni 900 þúsund krónur í málskostnað.

Konunni var sagt upp störfum í febrúar 2012 að undangenginni áminningu mánuði áður vegna staðhæfinga um að hún hefði átt þátt í einelti gagnvart samstarfsmanni sínum.

Í dómnum segir að skylt sé  að veita starfsmanni sínum áminningu og gefa honum færi á að bæta ráð sitt áður en honum er sagt upp störfum, eigi uppsögnin rætur að rekja til ástæðna sem þar eru greindar.

Í greinagerð ÁTVR kemur fram að ábendingar um einelti í einni vínbúð fyrirtækisins hafi borist snemmsumars 2010.  Af því tilefni hafi verið leitað til sálfræðinga með beiðni um að lagt yrði mat á samskipti starfsmanna á vinnustaðnum og gengið yrði úr skugga um hvort einelti ætti sér þar stað.

Yfirmenn konunnar funduðu með henni þar sem henni var gert grein fyrir niðurstöðum skýrslunnar. Hún fékk þó ekki afrit af skýrslunni né samantekt vegna hennar. Þá segir að staðfest sé með framburði stjórnenda, gegn neitun konunnar, að hún hafi á þessum fundi verið gerð grein fyrir þeirri niðurstöðu sálfræðinganna að hún væri í hópi starfsmanna sem legðu samstarfsmann sinn í einelti.

Þá kom fram hjá mannauðsstjóra ÁTVR að hún hefði hitt konuna og fleiri starfsmenn í desember 2011, en ekki er komin sönnun að hún hafi þar rætt við stefnanda um þessi mál.

Dómari telur að konunni hafi ekki verið gefið fullnægjandi og raunhæft tækifæri til að tjá sig um ávirðingar í hennar garð áður en ákvörðun um að áminna hana. Því hafi verið brotið gegn lögbundnum andmælarétti hennar. Því hafi uppsögn hennar verið ólögmæt.