Mini Market opnar á ný

Eigandi pólsku matvöruverslunarinnar Mini Market, sem gjöreyðilagðist í bruna í desember, opnaði verslunina að nýju í dag. Hann segir það hafa tekist með hjálp vina og viðskiptavina sem lögðu hönd á plóg.

Piotr Jakubek hafði rekið Minimarket í Eddufelli í níu ár þegar eldur kviknaði í versluninni níunda desember síðastliðinn. Allar vörur og tæki verslunarinnar gjöreyðilögðust í brunanum. 

Piotr lýsti brunanum sem martröð og sagðist í fyrstu hafa ákveðið opna verslunina ekki aftur. En eftir að viðskiptavinir Mini Market hvöttu hann áfram ákvað Piotr að láta slag standa. Í dag, fjórum mánuðum eftir brunann, opnaði svo ný endurbætt verslun.

Piotr segir að sér hefði ekki tekist að endurbyggja Mini Market ef ekki væri fyrir hjálp fjölskyldu, vina og viðskiptavina.

„Ég hefði aldrei trúað þessum viðbrögðum. Það er ótrúlegt hversu hjálpsamt fólk var og allir voru tilbúnir að leggja hönd á plóg. Fólk bara gat ekki hugsað sér að hafa ekki pólsku búðina í hverfinu og það þykir mér vænt um,“ segir Piotr, en fullt var út úr dyrum í Mini Market í allan dag.