Brynjar Níelsson afneitar bróður sínum

Gústaf Níelsson sagnfræðingur kærði Sigurbjörgu Sigurgeirsdóttur stjórnsýslufræðing til siðanefndar HÍ vegna skrifa hennar. Málið komist í fréttir og hefur DV fjallað skilmerkilega um það. Brynjar Níelsson þingmaður, bróðir Gústafs, segir þá ekki klikka á þeim bænum -- alltaf þegar málið sé til umfjöllunar er tekið fram að þeir tveir séu bræður. Brynjar furðar sig á því að blaðamenn DV telji sig þurfa að koma því að þessu með bróðernið þó innihald fréttarinnar hafi ekkert með sig að gera. Og Brynjar bætir um betur í orðsendingu sem hann setur á Facebook:

„Svo eru áhöld um það hvort Gústaf sé raunverulega bróðir minn. Sögur hafa gengið um að hann sé tökubarn og faðir minn heitinn hafi fundið hann á ferðalagi einhvers staðar í austurlöndum nær, sennilega nálægt Beirút. Sel það þó ekki dýrara en ég keypti.“

„Þetta er misskilningur hjá Brynjari,“ segir Gústaf en Vísir náði í hann um það bil sem hann var að stíga upp í flugvél, á leið til Spánar. „Kenningin gengur út á það ég hafi fundist á sorphaugum í sígaunahverfi á Ítalíu. En, fræðimenn greinir á um þetta.“

Vert er að geta þess að miðað við tóninn í þeim bræðrum virðist sem þeim sé fremur skemmt yfir þessum bollaleggingum en hitt.

Innlegg by Brynjar Níelsson.