Sjálfstæðisflokkurinn klofinn í Reykjanesbæ

Frjálst afl, klofningsframboð úr Sjálfstæðisflokknum í Reykjanesbæ,  býður fram fyrir bæjarstjórnarkosningar þar í vor. Gunnar Þórarinsson oddviti listans og fyrrverandi bæjarfulltrúi Sjálfstæðismanna segir mikilvægt að vinna á miklum skuldum bæjarfélagsins.

Gunnar Þórarinsson oddviti hins nýja framboðs í Reykjanesbæ, Frjáls afls, hefur verið bæjarfulltrúi Sjálfstæðisflokksins á þessu kjörtímabili og var í öðru sæti á lista Sjálfstæðismanna fyrir síðustu kosningar. Í prófkjöri fyrir kosningarnar í vor bauð hann sig fram í 1. til 2. sæti og sóttist því eftir að leiða listann sem Árni Sigfússon hefur gert síðustu kjörtímabil.

„Í kjölfar prófkjörs sem haldið var hérna lenti ég í fimmta sæti en uppstilling var látin ráða eftir það,“ segir Gunnar.

Uppstillingarnefnd bauð Gunnari sjöunda sætið, sem verður að teljast baráttusæti listans sem hefur sjö bæjarfulltrúa í dag, þótt Gunnar hafi fengið um 30 prósent atkvæða í fyrsta sætið. Gunnar vildi að niðurstöður prófkjörsins stæðu.

„Í kjölfarið skrifaði ég grein þar sem þar sem fyrirsögnin var að prófkjörið hefði verið virt að vettugi og ég nefndi þar að ég væri tilbúinn til að fara í sérframboð ef ég fengi til þess áskoranir og meðmæli til að fara í það. Niðurstaðan varð sú að mjög margt fólk hefur haft samband við mig og skorað á mig að fara í framboð,“ segir Gunnar.

Upp úr því hafi síðan Frjálst afl verið stofnað.

Hvaða mál voru það sem helst skildu þig að frá öðrum?

„Það eru fyrst og fremst skuldamálin sem ég hef viljað taka fastari tökum,“ segir Gunnar. Fyrsta mál á dagskrá sé að snúa við þeim mikla halla sem sé á bæjarsjóði  „Til einhverjar hagsældar fyrir íbúana þannig að við getum í raun og veru farið að veita meiri þjónustu og gera meira fyrir bæjarbúa, jafnvel lækka gjöldin á þá,“ segir Gunnar.

Engu að síður vilji Frjáls afl verja grunnþjónustu bæjarins.

„Við höfum fullt af tækifærum hérna til að byggja upp fjölbreytt atvinnulíf og Frjálst afl mun leggja sitt að mörkum til að þau tækifæri verði nýtt,“ segiri Gunnar Þórarinsson oddviti í Frjálsu afli.