Aðalheiður mælir með samningnum

Framhaldsskólakennarar og samninganefnd ríkisins undirrita kjarasamning sem gildir í tvö og hálft ár hjá ríkissáttasemjara síðar í dag. Kennarar fóru fram á 17 prósent launaleiðréttingu og segist formaður samninganefndar félagsins vel geta mælt með samnngnum við kennara.

Verkfall framhaldsskólakennara hófst hinn 17. febrúar eftir árangurslausar samningaviðræður í á þriðja mánuð. Framhaldsskólanemar hafa því misst þrjár dýrmætar vikur úr kennslu, en það á eftir að koma í ljós hvort ótti manna um mikið brottfall nemenda verður að ræða vegna verkfallsins mun rætast. Aðalheiður Steingrímsdóttir formaður samninganefndar Félags framhaldsskólakennara segir útlit fyrir að skrifað verði undir nýjan kjarasamning seinnipartinn í dag.

Er þetta samningur sem þú treystir þér vel til að mæla með við þitt fólk?

„Já, ég treysti mér algerlega til þess. Þetta er samningstími upp á tvö og hálft ár. Fram til haustsins 2016,“ segir Aðalheiður. En kennarar lögðu fram með þá kröfu að fá 17 prósent hækkun á launum.

„Okkar markmið var að ná fram umbótum á launum og slakri launaþróun í framhaldsskólum, og já við náðum árangri varðandi þetta markmið,“ segir Aðalheiður og fæst ekki til að upplýsa frekar um niðurstöðuna varðandi launaliðinn, enda eigi eftir að kynna samningana endanlega fyrir umbjóðendum hennar.

En það hefur kostað sitt að ná þessum samningum fram og Aðalheiður segir að vissulega hefði verið betra ef eiginlega samningaviðræður hefðu hafist fyrr.

„En, það er bara gott að við náðum að lokum saman um málin. Þannig að verkfall þarf ekki að verða lengra en orðið er“ segir hún. En nemendur hafa misst þrjár dýrmætar vikur úr kennslu og þeim verði bætt það upp.

„Það er alltaf hluti af lokafrágangi að ræða um hvernig hægt er að bæta nemendum upp tímann og það er líka núna í þetta skiptið en ég get ekkert sagt um það hvernig það verður gert . Það kemur bara í ljós,“ segir Aðalheiður Steingrímsdóttir, en að öllu óbreyttu hefst kennsla í framhaldsskólum landsins á mánudag.