Evran gæti gengið að ESB dauðu

Evran gæti gengið að Evrópusambandinu dauðu. Þetta er mat eins kunnasta sérfræðings Evrópu í öryggis- og alþjóðastjórnmálum. Hann hvetur Íslendinga til að ganga í Evrópusambandið en halda sig víðs fjarri evrunni.

Frakkinn François Heisbourg hélt fyrirlestur í Háskóla Íslands í dag um þann vanda sem kominn er upp í Evrópusambandinu vegna evrunnar. Hann gaf út bókina Endalok evrópska draumsins síðasta ári sem vakti nokkra athygli. Í bókinni rekur Heisbourg þann vanda sem fylgt hefur evrunni. Heisbourg er Evrópusinni en telur evruna geta leitt til upplausnar Evrópusambandsins.

„Evran hefur, því miður, vegna þess að hún var tekin upp of fljótt, hún var tekin upp án pólitískra stofnana og án þeirra fjármálatækja sem nauðsynleg eru til að standa undir henni, neytt okkur til að taka upp stefnu sem hefur samdráttar- og sundrungaráhrif, bæði innan landa og á milli landa. Þetta var tilraun sem mistókst. Við verðum að hætta við þessa tilraun.,“ segir Heisbourg

Heisbourg fullyrðir að Bretar hefðu ekki beitt hryðjuverkalögum á Íslendinga haustið 2008 hefði Ísland verið í Evrópusambandinu. „Þið eruð ekki meðlimir í klúbbnum. Ef þið hefðuð verið í Evrópusambandinu 2008 hefðu Bretar aldrei virkjað hryðjuverkalögin. Slíkur þrýstingur hefði ekki verið notaður gegn ykkur.“

Heisbourg telur Íslendinga eiga fullt erindi inn í Evrópusambandið en mælir gegn því að tekin verði upp evra hér á landi.

„Upptaka evru við núverandi aðstæður er nokkuð sem ég á mjög erfitt með að skilja. Sjáið hvernig löndum eins og Svíþjóð eða Póllandi vegnar. Þau er í Evrópusambandinu en ekki á evrusvæðinu. Þeim gengur mjög vel efnahagslega, félagslega og pólitískt, og þetta eru sönn Evrópuríki,“ segir François Heisbourg.