Sveitar­fé­lagið og út­gerðar­menn byggja nýjan mið­bæ á Höfn

Í fréttatilkynningu frá sveitarfélaginu segir að samkvæmt samkomulaginu muni Landsbyggð vinna heildarskipulag fyrir svæðið á eigin kostnað, í nánu og virku samráði við sveitarfélagið, íbúa, rekstraraðila og aðra hagsmunaaðila.

Leggja áherslu á gagnsæi

Markmiðið sé að skapa lifandi og aðlaðandi miðbæ þar sem mannlíf, þjónusta, menning, íbúðir og opin svæði mætast og endurspegla sérkenni Hornafjarðar.

Verkefnið marki jafnframt upphaf að nýrri og heildstæðri þróun miðbæjarins, þar sem áhersla verði lögð á staðaranda, sjálfbæra hönnun og tengsl við sjávarsíðuna og höfnina.

Sveitarfélagið og Landsbyggð leggi ríka áherslu á opið og gagnsætt ferli, með kynningarfundum og íbúakosningu eða rafrænni kosningu áður en endanlegt skipulag verður samþykkt.

„Hér er á ferðinni einstakt tækifæri til að þróa og móta hjarta bæjarins, stað sem endurspeglar kraftinn og þau sérkenni sem Hornafjörður býr yfir. Með samstarfinu við Landsbyggð fáum við öflugan þróunaraðila í lið með okkur sem hefur áður staðið að slíkri uppbyggingu með góðum árangri, eins og nýi miðbærinn á Selfossi ber glöggt vitni um. Við munum leggja mikla áherslu á gagnsæi og lýðræðislega þátttöku íbúa með kynningarfundum og opnu samtali um skipulagið og þróun þess,“ er haft eftir Sigurjóni Andréssyni, bæjarstjóra Hornafjarðar.

Einstakt bæjarstæði

„Við erum þakklát fyrir það traust sem okkur er sýnt og hlökkum til að takast á við þetta spennandi verkefni. Höfn er einstakt bæjarstæði með gríðarleg tækifæri. Við munum vinna náið með sveitarfélaginu, íbúum og öðrum lóðarhöfum og leggjum áherslu á að finna og rækta staðarandann við hönnun miðbæjarins. Markmiðið er að skapa lifandi og heillandi miðbæ þar sem samfélagið allt getur átt hlut að máli,“ er haft eftir Guðjóni Auðunssyni, stjórnarformanni Landsbyggðar

Fyrirtækið Skinney-Þinganes hf. hafi átt frumkvæði að því að kanna möguleika á uppbyggingu miðbæjarins og eigi nú í viðræðum við Landsbyggð um þátttöku í verkefninu. Áhugi þess og framtak sé mikilvægur þáttur í þeirri sameiginlegu sýn sem nú sé að mótast.

Samkomulagið marki upphaf að umfangsmiklu samstarfsverkefni, sem muni móta nýjan miðbæ Hafnar í Hornafirði til næstu áratuga og skapa ný tækifæri fyrir samfélagið, atvinnulíf og gesti. Áhersla verði lögð á að tryggja áframhaldandi aðgengi almennings að höfninni og að nýr miðbær verði hannaður í sátt við umhverfið og sögulegt samhengi staðarins.

Framkvæmdir séu áætlaðar í áföngum og stefnt að því að kynna fyrstu tillögur á opnum fundum með íbúum á næstu mánuðum.

Vinna þegar að uppbyggingu á Selfossi

Landsbyggð sé þróunar- og fasteignafélag sem sérhæfir sig í endurreisn og uppbyggingu bæjarkjarna utan höfuðborgarsvæðisins. Félagið standi að uppbyggingu nýs miðbæjar á Selfossi, sem hafi vakið mikla athygli fyrir hönnun, staðaranda og fjölbreytt mannlíf.

Verkefnið á Höfn sé hluti af heildarstefnu Landsbyggðar um að styrkja byggð og skapa lifandi miðbæi í þéttbýlisstöðum víða um land, sem endurspegla sérkenni hverrar byggðar og stuðla að sjálfbærni, atvinnulífi og auknum lífsgæðum.