L-listinn og Bæjarlistinn sameinast

L-listinn, Listi fólksins, og Bæjarlistinn á Akureyri munu sameinast og bjóða fram einn sameiginlegan lista í bæjarstjórnarkosningunum þann 31. maí. Í tilkynningu segir að boðið verði fram undir nafninu L-listinn, bæjarlisti Akureyrar. Listabókstafurinn verður L.

Þá segir að frambjóðendur verði kynntir á næstu dögum sem og megináherslur framboðsins. L-listinn fékk sex fulltrúa kjörna og Bæjarlistinn einn í síðustu bæjarstjórnarkosningum.

 Í tilkynningunni segir að viðræður um sameiningu hafi hafist nokkru en endanleg ákvörðun verið tekin í dag. Oddvitar listanna kjörtímabilið 2010-2014, Geir Kr. Aðalsteinsson L-lista og Sigurður Guðmundsson Bæjarlistanum, segjast  ánægðir með niðurstöðuna.

„L-listinn og Bæjarlistinn eru um margt svipuð framboð og hafa bæði það meginmarkmið að stuðla að hagsmunum og framgangi Akureyrar og bæjarbúa en vera um leið óháð landsmálapólitík. Að baki okkur er stór hópur fólks sem hlakkar til að vinna áfram að bæjarmálunum næstu árin, reynslunni ríkara eftir viðburðaríkt kjörtímabil,“ segir Geir.

„Bæjarlistinn var nýtt framboð í síðustu kosningunum og hefur starfið í bæjarstjórn verið ánægjulegt. Frá upphafi höfum við átt gott samstarf við L-listann sem hefur styrkst eftir því sem liðið hefur á kjörtímabilið. Traust hefur ríkt á milli okkar og ágreiningur um einstök mál ekki haft áhrif þar á. Í mínum huga hefur sameining framboðanna verið rökrétt skref um nokkurt skeið,“  segir Sigurður.