Þingmenn sammála um að bæta kjör lífeyrisþega

Þingmenn allra flokka telja nauðsynlegt að bæta kjör elli- og örorkulífeyrisþega. Félagsmálaráðherra segir að nú þegar hafi skerðing kjara þeirra verið bæt töluvert en meira megi gera í þeim efnum. Þá ræddu þingmenn einnig svarta atvinnustarfsemi í ferðmannaþjónustunni á Alþingi í dag.

Bráðabirgðaákvæði í lögum sem kom í veg fyrir að greiðslur almannatrygginga skertust krónu á móti krónu vegna greiðslu úr lífeyrissjóðum er fallið úr gildi og lýstu margir þingmenn áhyggjum sínum yfir því í dag.

Birgitta Jónsdóttir þingflokksformaður Pírata hóf umræður á Alþingi í dag um stöðu elli- og örorkulífeyrisþega. Margir þeirra ættu ekki fyrir helstu nauðsynjum eins og mat og lyfjum og væru með kvíðahnút í maganum flesta daga. Brýnt væri að standa við loforð um að leiðrétta stöðu þeirra eins og stjórnarflokkarnir hefðu lofað.

Þingmenn allra flokka tóku undir þetta. Þótt síðasta ríkisstjórn hefði reynt að hlífa þeim með allra lægstu bæturnar þyrfti að leiðrétta forsendubrest sem þessi hópur hefði orðið fyrir umfram aðra.

Eygló Harðardóttir félagsmálaráðherra sagði rétt að síðasta ríkisstjórn hefði hlíft þeim lakast settu en núverandi stjórn hefði einnig gert margt til að lagfæra kjör öryrkja og ellilífeyrisþega og dregið til baka skerðingu á kjörum þeirra frá árinu 2009.

Félagsmálaráðherra sagði samstöðu ríkja á Alþingi um að gera vel í velferðarmálum og ræður fjölda þingmanna staðfesti það. Hún sagði þó margt hafa verið gert á fyrsta starfsári ríkisstjórnarinnar, leiðrétt skerðingu frá árinu 2009, hækkað frítekjumark vegna atvinnutekna og framlengt út þetta ár.

En þingmenn ræddu einnig svarta atvinnustarfsemi í ferðamannaþjónustunni. Ferðamönnum hefði fjölgað um tugi prósenta á undanförnum árum en sú fjölgun hefði ekki skilað sér með samsvarandi aukningu tekna ríkissjóðs. Þorsteinn Sæmundsson þingmaður Framsóknarflokksins sagði bílaleigum hefði fjölgað mikið en margar þeirra hefðu hvorki skráð símanúmer né starfsmenn. Grunur léki á að bílar væri keyptir inn á bílaleigukjörum og þeir leigðir á kostnaðarverði til starfsmanna í ferðaþjónustunni og síðan seldur að nokkrum mánum liðum.

Guðlaugur Þór Þórðarson þingmaður  Sjálfstæðisflokksins tók undir áhyggjur margra þingmanna af svartri atvinnustarfsemi í ferðamannaþjónustunni. Þannig hefði kortavelta erlendra ferðamanna aukist um 30 prósent á sama tíma og hafi skattekjur af ferðamönnum aukist um 10 prósent.