Árni Páll gagnrýnir vinnubrögð ríkisstjórnarinnar

„Mér finnst viðbrögð ríkisins hafa einkennst af miklu ráðleysi,“segir Árni Páll Árnason, formaður Samfylkingarinnar, um kjaradeilu kennara í viðtali í Sprengisandi í dag. Þá segir hann hugmyndir Illuga Gunnarssonar, menntamálaráðherra, um styttingu framhaldsskólanna algjörlega óútfærðar. Hann segir þetta spurningu um skólastefnu og samfélagslega mikilvæg skref sem taka þurfi í sátt.

„Er það skilningur minn að menn séu komnir á einhvern upphafsreit í þessum kjaraviðræðum og elti svolítið skottið á sér.“

Honum finnst menn vera búnir að missa sjónar á því hvernig fara eigi í umbætur á skólamálum og beri að vinna þær í samstöðu.

„Þetta er ekki kjaramál. Það á að ræða við kennara um kjör á forsendum kjara en ekki blanda inn í það óskyldum málum eins og skipulagsmálum.“

Þá gagnrýnir Árni ríkisstjórnina fyrir að hafa komið minna að borðinu en aðilar vinnumarkaðarins hafa óskað eftir.

„Hún hefur sérstaklega lagt sig í framkróka að gera lítið fyrir þá sem eru á meðaltekjum og lægri tekjum.“