Berlínarferð hangir á bláþræði

Námsferð rúmlega tuttugu nemenda við Fjölbrautaskóla Snæfellinga er nú í uppnámi vegna verkfalls framhaldsskólakennara. Fyrirhuguð brottför er á fimmtudaginn og bíða skólastjórnendur nú eftir því hvort launadeila kennara leysist fyrir þann tíma.

Óvíst er hvort að þýskukennarinn við skólann geti farið með nemendum sínum til Berlínar, því óvíst er hvort það sé verkfallsbrot.

Jón Eggert Bragason er skólameistari Fjölbrautaskóla Snæfellinga. Hann leitar nú lausna á málinu.

„Á meðan kennaraforystan gefur okkur vonir um að deilan muni leysast á næstu dögum þá vil ég ekki slá ferðina útaf borðinu,“ útskýrir Jón Eggert.

Búið að standa til lengi

Langt er síðan sú ákvörðun var tekin að nemendur við skólann færu í námsferð til Berlínar. Nemendur hafa safnað fyrir ferðinni.

Augljóst er að kostnaður við svona ferðalag er talsverður. „Ég er ekki með nákvæma tölu, en þetta er flug og gisting,“ útskýrir Jón Eggert og bætir við: „Miðarnir voru keyptir fyrir mörgum vikum og ferðin var hugsuð sem hluti af námsmati í áfanga.“

Jón Eggert er því í biðstöðu. „Það er eiginlega engin niðurstaða í málinu góð, nema að launadeilan leysist,“ segir hann.

Leita til verkfallsstjórnar

„Það sem við erum að skoða á þessari stundu er að leita til verkfallsstjórnar um þetta og sækja um undanþágu. Ég hitti kennarann á eftir og við munum funda um málið,“ útskýrir skólameistarinn.

Aðrir kostir í stöðunni eru til dæmis að senda foreldra út með nemendum. Þá gætu spurningar vaknað upp um á hvers ábyrgð nemendur eru, á meðan þeir eru erlendis.

Einnig gæti kennarinn farið með – en launalaust. „Það er ekkert sem bannar kennaranum að ferðast í verkfallinu og hann gæti tæknilega farið á þarna út og fara bara þá á eigin kostnað. Þá er spurning hvort það heiti að fara bara í kringum hlutinn,“ segir Jón Eggert.

„Best væri ef verkfallið leysist eða þá ef undanþágur fáist fyrir ferðinni og það er verið að skoða þá lausn núna.“