Fundu fíkniefni hjá íslenskum sjómanni

Tollverðir haldlögðu um 1.5 kíló af fíkniefnum sem fundust hjá íslenskum sjómanni fyrr í þessum mánuði en þetta kemur fram í fréttatilkynningu frá Tollstjóranum.

Um var að ræða 1.3 kíló af maríjúana og um 200 grömm af hassi.

Tollverðirnir höfðu afskipti af manninum, sem var skipverji á dönskum rækjutogara, sem átti að sigla á næstu dögum til Grænlands.

Skipið hafði verið tollafgreitt við komuna til landsins nokkrum dögum áður. Grunur leikur á að efnin hafi verið ætluð til útflutnings frá Íslandi til Grænlands.

Lögreglan á höfuðborgarsvæðinu fer með rannsókn málsins, sem er á lokastigi.