Neita að hafa notað skattfé við endurskipulagningu

Sindri Sigurgeirsson, formaður Bændasamtaka Íslands, segir skattfé ekki hafa verið notað við fjárhagslega endurskipulagningu Hótels Sögu ehf. Þetta segir hann í yfirlýsingu vegna fréttaflutnings Kjarnans, sem hann segir rangan.

„Fullyrðingar um að skattfé hafi verið notað við fjárhagslega endurskipulagningu Hótels Sögu ehf. eru algjörlega úr lausu lofti gripnar. Fjármagn sem merkt er Bændasamtökum Íslands á fjárlögum vegna lögbundinna verkefna var ekki og hefur aldrei verið notað í tengslum við eignaumsýslu samtakanna. Allt þetta fjármagn fer í verkefni samkvæmt búnaðarlagasamningi,“ segir í tilkynningunni.

Fjárframlög samkvæmt búnaðarlagasamningi 2013 skiptust, samkvæmt tilkynningunni, í eftirtalin verkefni: 87,0 milljónir í búfjárræktarstarf, þ.e. til kynbótaskýrsluhalds, kúasæðinga og ræktunarstöðva. 338,0 milljónir í ráðgjafarþjónustu til bænda. 60,0 milljónir í styrki til bænda vegna kornræktar, hreinsunar affallsskurða auk 3,5 milljóna til bænda vegna aðlögunar að lífrænni ræktun.

„Í meginatriðum fól fjárhagsleg undurskipulagning félagsins í sér að hlutafé Hótels Sögu ehf. var hækkað um 250 milljónir króna. Bændasamtökin skráðu sig fyrir öllum hlutunum. Þá hafi skuldir félagsins lækkað vegna afskrifta bæði lánveitenda og Bændasamtaka Íslands, auk þess sem áhvílandi lánum var skuldbreytt.“

Þá framseldu félagið og Bændasamtökin Arion banka öll hlutabréf í Hóteli Íslandi ehf., en bankinn seldi síðar fasteign Hótels Íslands við Ármúla í Reykjavík.

Áðurnefnd hlutafjárhækkun var fjármögnuð að stærstum hluta með lánsfé, 165 milljónir króna, og að hluta með sjálfsaflafé, 85 milljónir. Þá var þriðja hæð Bændahallarinnar við Hagatorg veðsett.