„Tækifæri fyrir skemmtilegt fólk að hittast“

„Það er skemmtilegt að vera komin í Ráðhúsið og hitta borgarstjórann,“ segir Auður Lára Sigurðardóttir, 29 ára fötluð kona, sem fékk tækifæri á að kynnast störfum borgarstjórans Jóns Gnarr í dag í tilefni Fyrirmyndardagsins.

Fyrirmyndardagurinn er dagur þar sem fyrirtæki bjóða atvinnuleitendum með skerta starfsgetu að fylgja starfsmanni eftir í sínu fyrirtæki eða stofnun í einn dag eða hluta úr degi. Dagurinn verður haldinn í fyrsta sinn á Íslandi 4. apríl. Vinnumálastofnun stendur að deginum og hugmyndin er a um árlegan viðburð verði að ræða.

Jón Gnarr tók forskot á daginn og bauð einum atvinnuleitanda að fylgja sér eftir í dag. Auður Lára var mætt í Ráðhúsið um klukkan 11 að hitta Jón.

Frábært verkefni og gott tækifæri

Blaðamaður og ljósmyndari Vísis hittu þau Auði Láru og Jón í Ráðhúsi Reykjavíkur. Auður Lára og Jón ræddu ýmislegt sín á milli, meðal annars um hlutverk Jóns sem Georg Bjarnferðarson og fór vel á með þeim.

Auður Lára býst við því að læra eitthvað í dag. „Ég vona það líka,“ sagði hún. En þetta er í fyrsta sinn sem Auður Lára fer í heimsókn á vinnustað til að kynna sér starfsemi.

Viðbrögð fyrirtækja og stofnana við þessum degi hafa verið mjög góð að sögn forsvarsmanna dagsins. Auður Lára og Jón sögðu að fjöldi vinnustaða myndu taka þátt í þessum degi. Jón bjóst ekki við því að fleiri kæmu til hans er einhverjir myndu mæta í kynningu í Ráðhúsinu.

„Þetta er gert til þess að kynna ákveðin atvinnutækifæri fyrir fötluðum. Sem þeir annars hefðu kannski ekki uppgötvað,“ sagði Jón.

„Þetta getur leitt til alls mögulegs. Kannski ákveður Auður að bjóða sig fram til borgarstjóra,“ sagði Jón og þau Auður Lára skellihlógu bæði.

„Gæti verið, sjáum til,“ svaraði Auður Lára. Jón sagðist algerlega viss um að Auður yrði frábær borgarstjóri.

„Mér finnst þetta bara frábært verkefni og tækifæri fyrir skemmtilegt fólk að hittast og skiptast á upplýsingum og skapa tækifæri og fá nýjar hugmyndir,“ sagði Jón.