Hjartaþræðingatækið að mestu fjármagnað með gjafa- og söfnunarfé

Nýtt hjartaþræðingatæki var vígt formlega á Landspítalanum í dag. Kaup á tækinu voru að stórum hluta fjármögnuð með söfnunar- og gjafafé að sögn Davíðs O. Arnar, framkvæmdastjóra lyflækningasviðs sjúkrahússins. Tækið hefur verið í notkun síðustu tvær vikur.

„Þar vegur þyngst framlag frá minningasjóði Jónínu Gísladóttur en einnig kom fé, frá Hjartaheill og Neistanum sem eru samtök hjartveikra barna, sem meðal annars safnaðist í landssöfnun síðasta haust.

Tækið kostaði 150 milljónir króna og af því nam söfnunar- og gjafaféð rúmlega 90 milljónum.

Tækið sem hið nýja leysir af hólmi var komið nokkuð til ára sinna og hafið verið í notkun í 16 ár. „Það var komið vel fram yfir hefðbundinn notkunartíma sem er alla jafna um 8 til 10 ár,“ segir Davíð.

Tækinu hafði verið vel við haldið en eldri tækjum fylgir aukin tíðni bilana. Þetta hafði leitt til þess að viðhaldsdögum hafði fjölgað og því komu dagar sem ekki var hægt að nota það til hjartaþræðinga. Nýja tækið hefur ýmsa kosti fram yfir það gamla eins og minni geislaskammta og betri myndgæði. Það er einnig talvert notendavænna.

Um 150 bráðatilfelli á hverju ári utan hefðbundins vinnutíma

Þrjú hjartaþræðingatæki eru í notkun á spítalanum og eru starfmenn eru á vakt á þræðingastofunni allan sólarhringinn. Að sögn Davíðs eru 150 bráðar þræðingar vegna kransæðastíflu á ári utan hefðbundins vinnutíma. „Fólk sem fær kransæðastíflu getur auðvitað komið hvenær sem er og við þurfum að geta veitt bestu mögulegu þjónustuna öllum stundum,“ segir Davíð.

Bráð kransæðaþræðing með víkkun á lokuðu æðinni er kjörmeðferð við slíkum tilfellum en þegar kransæð stíflast hættir blóð að flæða um það svæði sem æðin nærir og þá getur myndast drep í hjartavöðva. „Slíkt ástand er mjög alvarlegt og er það sem almennt er kallað hjartaáfall,“ segir Davíð. „Ef æðin er opnuð innan 4 klukkustunda frá lokun eru mestar líkur á að draga úr skaða af völdum hjartaáfallsins.“