„Skelfileg lífsreynsla sem ég læri af“

„Það var mjög erfitt að fylgjast með honum í sjúkrabílnum á leiðinni til borgarinnar, hann var orðinn svo þreyttur,“ segir Sjöfn Ingvarsdóttir, móðir Auðuns Inga, tæplega fjögurra ára drengs, sem tók róandi lyf fyrir slysni í gær.

Það var snemma í gærmorgun að Auðunn Ingi kom til móður sinnar með tómt pillubox og sagði: „haha, ég kláraði allar töflurnar.“

„Gestur á heimilinu átti þetta box og ég varð strax mjög hrædd og hringdi í hann til að komast að því hvað var í boxinu,“ segir Sjöfn. Í ljós kom að sex róandi töflur hefðu verið í boxinu og Sjöfn hringdi umsvifalaust í neyðarlínuna.

Þau búa í Hveragerði og þurftu því að fara með sjúkrabílnum alla leið í bæinn. Sjöfn segir að sonur sinn hafi ekki verið líkur sjálfum sér á leiðinni en honum hafi þó fundist spennandi að vera í sjúkrabíl.

Drakk kol til að draga úr virkni lyfjanna

Þau mæðgin dvöldu á spítalanum í allan gærdag. Í fyrstu átti að setja sondu í gegnum nefið á Auðunni en það var ekki hægt þar sem í ljós kom að nefkirtlarnir voru svo stórir. Auðunn var heldur ekki neitt sérstaklega sáttur við að láta setja slöngur í gegnum nefið á sér og barðist um.

„Hann var kominn með blóðnasir eftir átökin,“ segir Sjöfn.

Því var brugðið á það ráð að láta hann drekka efnið sem að sögn Sjafnar kallast kol og á að draga úr virkni lyfjanna. „Hann vildi frekar drekka það þó honum þætti það ógeðslegt og ég get best lýst þessu þannig að þetta minni á tjöru í útliti en er víst ekki vont á bragðið,“ segir Sjöfn.

„Hann fékk að drekka þetta úr sprautu sem hann fékk í sjúkrabílnum á leiðinni.“

Vona að fleiri læri af þessu

Hún segir son sinn hafa verið orðinn góðan í gærkvöldi. „Hann var eldhress og vildi ekki fara að sofa og sagðist vera búinn að hvíla sig,“ segir Sjöfn.

Auðunn Ingi mætti svo í leiksskólann í morgun en hann var spenntur að hitta vini sína og sýna þeim hvað hann væri fínn með nýtt tattoo sem hann fékk í verðlaun á spítalanum.

„Slysin gera ekki boð á undan sér. Í þessi tilviki var boxið á þannig stað að hann átti ekki að ná til þess en hann prílaði upp á stól og komst þannig í lyfin,“ segir Sjöfn.

„Ég mun læra af þessu og það er von mín að aðrir taki þetta til athugunar og geti kannski lært af þessu líka,“ segir Sjöfn. „Þetta var skelfileg lífsreynsla og gott að það fór ekki verr.“